با کوردستانیان سەربەخۆیی بکەنە ئامانج و بۆی تێبکۆشن؛ با کۆمەڵگای نێودەوڵەتی ئامانج و تێکۆشانی کورد بە روون و راشکاویی ببینێ

بەیاننامەی پارتی ئازادیی کوردستانPAK
بە بۆنەی ٣٥هەمین ساڵوەگەڕی جیهادی تاران دژی کورد
رۆڵه‌کانی نه‌ته‌وه‌ی کورد!
کوردستانییه‌ نیشتمانپه‌روه‌ره‌کان!
35 ساڵ له‌مه‌وبه‌ر، له‌پاش زنجیره‌یه‌ک په‌لامار و دەسدرێژیی تاران ، سه‌ره‌نجام له‌ 28 گه‌لاوێژدا، خومه‌ینی رێبه‌ری کۆماری ئیسلامی، به‌ده‌رکردنی حوکمی جیهاد له‌ سه‌ر کورد، شه‌ڕی سه‌رانسه‌ریی به‌ دژی نه‌ته‌وه‌که‌مان لە رۆژهەڵاتی کوردستان، راگه‌یاند.
لە گەڵ ده‌رچوونی ئه‌و فه‌رمانه‌، ده‌یان هه‌زار که‌س له‌ هێزه‌کانی ئه‌رته‌ش و پاسداری کۆماری ئیسلامی له‌ عه‌رد و ئاسمانه‌وه‌ به‌ پاڵپشتی تۆپ و تانک و ته‌یاره‌، هێرشێکی به‌ربڵاویان بۆ سەر کوردستان دەسپێکرد. هێزە داگیرکەرەکانی بەر فەرمانی تاران له‌و هێرشه‌دا، هه‌زاران مرۆڤی کوردیان به‌تاک و کۆ، له‌ ناو برد. هه‌روه‌ها زۆر‌ ئاوایی و کێڵگه‌ و دار و ده‌وه‌نی وڵاته‌که‌مانیان کرده‌ سووتماک.
رۆڵه‌کانی نه‌ته‌وه‌ی کورد له‌ به‌رانبه‌ر حوکمی جیهادی خومه‌ینی و هێرشی هێزه‌کانی به‌رفه‌رمانیدا،به‌ وه‌رێخستنی به‌رخۆدانێکی مێژوویی، لاپه‌ڕێکی دیکه‌ی پڕ‌ سه‌روه‌رییان خسته‌سه‌ر مێژووی به‌ره‌نگاریی نه‌ته‌وه‌ی کورد به‌رانبه‌ر داگیرکه‌ران. له‌ ماوه‌ی 3 مانگدا، ده‌رسێکی وایان به‌ داگیرکه‌ران دادا که‌ سیسته‌می سه‌رکوت و داگیرکه‌ریی رێژیم په‌کی که‌وت و هه‌ر خومه‌ینی خۆی ناچار بوو فه‌رمانی راوه‌ستانی شه‌ڕ و بانگه‌وازی ئاشتی ده‌ربکا.
ئه‌و فه‌رمانه‌ی خومه‌ینی له‌ 28ی گه‌لاوێژدا به‌ دژی کورد ده‌ریکرد، هه‌ر چه‌نده‌ رواڵه‌تی ئایینی هه‌بوو، به‌ڵام له‌ ناوه‌ڕۆکدا، درێژه‌ی ئه‌و رێچکه‌یه‌ بوو که‌ حکومه‌ته‌ یه‌ک له ‌دووای یه‌که‌کانی دەولەتی ئێران هه‌ر له‌ شاکانی سه‌فه‌وییه‌وه‌ تا قاجار و په‌هله‌وی بۆ تووناکردنی کورد و به‌تاڵان بردنی سامانی وڵاته‌که‌ی و رووخاندنی هه‌ر قه‌واره‌یه‌ک له‌ حاکمییه‌تی نه‌ته‌وه‌یی ئه‌م نه‌ته‌وه‌یه‌، گرتبوویانه‌ به‌ر. ئه‌و فه‌رمان و کرداره‌ دژی ئینسانییه‌، له‌ یاسای نێوده‌وڵه‌تییدا لەخانه‌ی ژێنۆساید و کۆمه‌ڵکوژییدا لێیدەکۆڵدرێتەوە.
خۆڕاگری و کۆڵنه‌دانی کورد و به‌رپه‌رچدانه‌وه‌ی داگیرکه‌ر و حه‌ولدان بۆ به‌رقه‌راریی سه‌روه‌ریی نه‌ته‌وه‌ییش، نه‌ریتێ بوو که‌ له‌ شێخی شۆڕشگێران شێخ عوبه‌یدوڵڵای نه‌هری و سه‌رداری گه‌وره‌ی گه‌ل سمکۆی شکاک و هه‌ڵۆی سووری مه‌ڵبه‌ندی لوڕستان قه‌ده‌م خێر و پێشه‌وای شه‌هیدی گه‌ل قازی محه‌مه‌ده‌وه‌ به‌میرات بۆ رۆڵه‌کانی نه‌ته‌وه‌ی کورد مابووه‌وه‌.
به‌مجۆره‌ بیست و هەشتی گەلاوێژ، رۆژی رووبەروو بوونەوە و پێکداهەڵشاخانی دوو ناسیونالیزم و دوو ناسنامەی ئێرانی و کوردستانی بوو. جیهاد به‌ دژی نه‌ته‌وه‌ی کورد، سیمبولی ناسیۆنالیزمی داگیرکه‌ر، هێرشبەر و خۆسه‌پێنی ئێرانی و به‌ربه‌ره‌کانی و به‌رخۆدانی جه‌ماوه‌ریی کورد، هێمای ناسیۆنالیزمی ئازادیبه‌خشی کوردی بوون.
شه‌ڕ و دەسدرێژییەکانی تاران له‌ دژی نه‌ته‌وه‌ی کورد له‌ رۆژهه‌ڵاتی کوردستان، نه‌بڕاوه‌ته‌وه‌ و درێژه‌ی هه‌یه‌. تێرۆری رێبه‌ران و تێکۆشەرانی سیاسی، ئێعدامی رۆڵه‌کانی کورد، به‌تاڵان بردنی سامانی نه‌ته‌وه‌یی کورد، تێکدانی باری دیمۆگرافی هه‌رێمه ره‌سه‌نه‌کانی‌ کوردستان، حه‌ولدان بۆ شێواندنی ناسنامه‌ و کلتور و که‌سایه‌تی کورد، بڵاوکردنه‌وه‌ی ماده‌ هۆشبه‌ره‌کان، په‌ستاندنی هه‌زاران کورد له‌ ئه‌شکه‌نجه‌گاکان و کوشتاری به‌رده‌وامی ڕۆڵه‌کانی کورد له‌سه‌ر سنووره‌کان، درێژه‌ی ئه‌و حوکم و شه‌ڕه‌یه‌ که‌ 3٥ ساڵ له‌مه‌و‌به‌ر به‌سه‌ر کورد دا سه‌پا.
به‌ڵام نه‌ داگیرکردن و میلیتاریزه‌کردنی کوردستان و نه‌ قوربانییه‌ زۆر و زه‌وه‌نده‌کانی نه‌ته‌وه‌ی کورد، ناسیونالیزمی ئازادییبه‌خشی کوردی نەشکاند و ئەمڕۆکە ، کوردایەتی لە سەدان خانە و بەستێنی جیاواز و فرەچەشندا، لە جووڵە و گەشەدایە و لە گەڵ هەڵکەوتنی هەر دەرفەتێکی لە بار، لە بزاڤێکی سیاسییەوە دەبێتە حاکمییەتێکی نەتەوەیی.
بیست وهەشتی گەلاوێژ لە کاتێکدا دەگەڕێتەوە کە هاوکووفەکانی خومەینی، لە رۆژاوا و باشووری کوردستان لە دژی کورد کەوتوونەتە” جیهاد” و بۆ رێگریی لە گەیشتنی کورد بە ئازادیی و سەربەخۆیی، تاوانی گەورە و گرانیان خوڵقاندوە. دیمەنە دڵتەزێنەکانی کوشتار و سەربڕینی مرۆڤی سویلی کورد لە دەڤەرەکانی کووبانی و بە تایبەت شنگال، راست دیمەنە هاوچەشن و شێوەکانی قاڕنا و قەڵاتان دێننەوە بەرچاو. بەڵام ئیرادەی ئازادیی و سەربەخۆییخوازیی سەرکردە و جەماوەری هێژا و وریای کورد، لە پیلان و تاوانی دوژمنانی ئەم نەتەوەیە بەهێزترە و هەورە تاریکەکانی ئاسمانی کوردستان هەرچی زووتر دەڕەوێنەوە و پرشنگی هەتاوی ئازادیی، شاخ و پێدەشتەکانی وڵات رووناکتر دەکاتەوە.
پارتی ئازادیی کوردستان کە بۆ کوردایەتی و خەبات ، لە نێوان پارچەکانی کوردستاندا سنوور نەناسە، شانازیی بەوەوە دەکا کە سەرکردە و پێشمەرگەی ریزەکانی، ئەگەر رۆژێ تا دوا دەرفەت قارەمانانی گۆڕەپانەکانی بەرەنگاری و تێکشکاندنی هێزە داگیرکەرەکانی ئێڕان بوون، ئەمڕۆ قارەمانانی سەنگەرەکانی بەرگری لە خاک و خەڵک و کیانی سیاسی کوردن لە باشووری نیشتمان و ئامادەی چوونیش بۆ رۆژاوای کوردستانن.
لەم بۆنەیەدا کە هاوکاتە لە گەڵ رووداوەکانی باشووری کوردستان و تێکڕاش کەوتوونەتە ٥٠٠ساڵەی دابەشکرانی کوردستانەوە، جارێکی دیکە لە سەر ئەو راستییە پێدادەگرینەوە کە دابەشکران، داگیرکران و بێدەوڵەتیی کورد، هۆکاری سەرەکیی هەموو غەدر و تاوانە کۆن و نوێییەکانە و تاکە دەستەبەری کۆتاییهاتنی یەکجاری کۆمەڵکوژی و ژێنوسایدی کورد لە رۆژهەڵاتی ناوەڕاست، وەدەسهێنانی بەرابەری سیاسی- حقوقی لە گەڵ نەتەوەکانی دیکەیە کە لە سەربەخۆیی و پێکهێنانی دەوڵەتی سەربەخۆدا دەبیندرێتەوە.
با تێکڕای کوردستانیان سەربەخۆیی و بەدوڵەتبوون بکەنە ئامانج و بۆی تێبکۆشن؛ با کۆمەڵگای نێودەوڵەتی ئامانج و تێکۆشانی کورد بە روون و راشکاویی ببینێ و ببیستێ.
 
پارتی ئازادیی کوردستانPAK
کۆمیته‌ی ناوه‌ندیی
28 گه‌لاوێژی 2714
19 ئاگۆستی 2012

 

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *