به‌یاننامه‌ی کۆمیته‌ی ناوه‌ندی PAK به‌ بۆنه‌ی 68 هه‌مین ساڵوه‌گه‌ڕی دامه‌زراندنی ده‌وڵه‌تی جهمووریی کوردستان

به‌یاننامه‌ی کۆمیته‌ی ناوه‌ندیی PAK

 به‌ بۆنه‌ی68 هه‌مین ساڵوه‌گه‌ڕی دامه‌زراندنی ده‌وڵه‌تی جهمووریی کوردستان

 

سڵاو له‌  رۆژی به‌ده‌وڵه‌تبوونی کورد

رۆڵه‌کانی نه‌ته‌وه‌ی کورد!

کوردستانییە  وڵاتپارێزەکان!

تێکۆشەرانی رێگای دامەزراندنەوەی دەوڵەتی جمهووریی کوردستان!

 

     2ی رێبه‌ندانی 2713 کوردی، 22 ژانوییه‌ی 2014 زایینی، 68 ساڵ به‌سه‌ر دامه‌زراندنی ده‌وڵه‌تی جمهوری کوردستاندا، رادەبرێ.

68 ساڵ لەمەوبەر لە رۆژی ٢ی رێبەنداندا، گۆڕەپانی چوارچرای شاری مهاباد بووە مەکۆی پیشاندانی ئیرادەیەکی بەهێزی نەتەوەیی و راگەیاندنی بڕیارێکی مێژوویی. ئه‌و رۆژه‌،له‌ میتینگێکی جه‌ماوه‌ریی رێفراندۆم ئاسادا، به‌ ئاماده‌بوونی پێشه‌وا قازی محه‌ممه‌د و “زه‌عیمی شۆرشی بارزان” و خه‌باتگێڕانی پارچه‌کانی دیکه‌ی کوردستان، سەربەخۆیی کوردستان و ده‌وڵه‌تی جمهوریی کوردستان راگه‌یەندرا.  پێشه‌وا قازی محەممەد لە نوتقێکی مێژووییدا ئاماژەی بە جوغرافیای کوردستان، خەباتی نەتەوەی کورد، میرنشینەکانی کورد و وەدەسهێنانی “استقلال و آزادی نەتەوەی کورد” کرد. هەروەها وه‌ک سه‌رکۆمار، سوێندی خوارد که‌: “تا ئاخر هه‌ناسه‌ و ئاخر تنۆکی خوێن، به‌گیان و به‌ماڵ له‌ ڕێی راگرتنی سه‌ربه‌خۆیی و به‌رزکردنه‌وه‌ی ئاڵای کوردستاندا تێبکۆشێ. پێشەوای کورد لەو نوتق و سوێندەدا لە حاڵێکدا کلیل واژەی وتەکانی حکومەت و نەتەوە و ئیستیقلال و ئازادیی و زمانی کوردی یە، بە تاکە وشەیەکیش، مانەوە لە چوارچێوەی ئێران و بە ئێرانی پێناسە کردنی کوردی بە زماندا نایە.هەروەها لە بڕیارنامەی کۆبوونەوەی دووی رێبەنداندا، بە ئاماژە بە دابەشکراویی کوردستان و دۆخی کورد لەژێر دەستیی دەوڵەتەکانی ئێران، ترکیا و عێراق پێ لەسەر “ئیستقلالی کورد” دادەگیرێ.

   دامه‌زراندنی کۆماری کوردستان هێمای سوور بوونی کورد له‌سه‌ر ئه‌ستاندنی ئازادی و وه‌دیهێنانی ئامانجه‌ له‌مێژینه‌کانی بوو؛ پچڕاندنی ئه‌و کۆت و به‌نده‌ بوو خر‌ابووه‌ ملی و ره‌تکردنه‌وه‌ی لکاندنی زۆرداره‌کیی خۆی و خاکی به‌ ده‌وڵه‌تی ئێران و هه‌ڵته‌کاندنی ئه‌و ته‌رتیباته‌ سیاسییه‌ بوو که‌ له‌ دوای کۆتایی شه‌ڕی چاڵدێران و شه‌ڕی یه‌که‌می جیهانییه‌وه‌ به‌سه‌ر کورددا سه‌پێندرابوو.

پێکهێنانی کۆماری کوردستان، ده‌ریخست که‌ کورد به‌ سه‌رکوت و زه‌بروزه‌نگ و تێرۆر و هه‌ڵواسینی سه‌رکرده‌کانی، له‌ ئامانجی رزگاریی یه‌کجاریی و به‌ده‌وڵه‌تبوون ده‌سهه‌ڵناگرێ و هه‌ر ده‌بێ وه‌دیی بێنێ.

    کۆماری کوردستان وه‌دیهاتنی ئاواته‌کانی حه‌زره‌تی خانی و حاجی قادری کۆیی و به‌ری خه‌باتی دوور درێژی کورد و ره‌نج و خوێنی سه‌رکرده‌ مێژووییه‌کانی: میربه‌درخان، شێخ عوبه‌یدوڵڵا نه‌هری، شێخ عه‌بدوسه‌لام بارزانی، شێخ سه‌عیدی پیران، سه‌یدره‌زای ده‌رسیم، سمایل ئاغای سمکۆی و مه‌لیکی کوردستان شێخ مه‌حمود و قەدەمخێری لوڕ و هه‌ڵۆکه‌ی ئارارات ژێنێڕاڵ ئیحسان نووری پاشا بوو له‌و‌ هه‌لومه‌رجه‌ هه‌ڵکه‌وتووه‌ نێوده‌وڵه‌تی و هه‌رێمییه‌دا.

    به‌دامه‌زراندنی جمهوری کوردستان، نه‌ته‌وه‌ی کورد له‌ به‌شێک له‌ نیشتمانه‌که‌یدا بووه‌ خاوه‌ن سه‌ره‌وه‌ریی سیاسیی و ده‌وڵه‌تێکی مۆدێڕنی نه‌ته‌وه‌یی بنیات نا.

ده‌وڵه‌تی جمهوری کوردستان متمانه‌ و باوه‌ڕبه‌خۆ بوونی بۆ مرۆڤی کورد گه‌ڕانده‌وه‌، سیمبۆل و هێما سیاسی و کولتورییه‌کانی ده‌وڵه‌تی داگیرکه‌ری له‌ کوردستانی سەربەخۆ سڕییه‌وه‌؛ کوردی کرده‌ خاوه‌ن ئاڵا و سروودی نیشتمانیی و ئه‌رته‌شی تایبەت بە خۆی‌؛ ناکۆکی و دوژمنایه‌تی له‌ نێو خه‌ڵک و خێڵه‌کان بەرەو نەمان برد؛ زمانی به‌ زۆر سه‌پاوی فارسی له‌ خوێندن و خوێندنگاکان هه‌ڵگرت؛ زمانی کوردیی فه‌رمیی کرد؛ رمێنی به‌ خوێندن و خوێنده‌واری دا؛ چاپخانه‌ و رادیۆ و سینه‌ما و شانۆ و کتێبخانه‌ی نەتەوایەتی دامه‌زراند؛ له‌گه‌ڵ ده‌وڵه‌تان که‌وته‌ وتوێژی راسته‌وخۆی سیاسی و مامه‌ڵه‌ی ئابووریی؛ رۆژنامه‌ و کۆواری کوردی له‌دایکبوون و فه‌رهه‌نگ و وێژه‌ی نه‌ته‌وه‌یی قۆناخێکی پرشنگداری به‌خۆوه‌ دیت. بێجگه‌ له‌وانه‌ش، ژنان ماف و دەرفەتی به‌شداریی له‌ ژیانی سیاسیی و پێکهێنانی رێکخراوه‌ی تایبه‌ت به‌خۆیان ده‌سکه‌وت، که‌مایه‌تییه‌ نه‌ته‌وه‌یی و دینی و مه‌زهه‌بییه‌کانی ناوچه‌کانی به‌رفه‌رمانی کۆمار وه‌ک هاونیشتمانیی یه‌کسان له‌گه‌ڵ کورد هه‌ڵسووکه‌وتیان له‌گه‌ڵ کرا و له‌گه‌ڵ کۆماری ئازه‌ربایجانیشدا په‌یمانی هاوکاریی دراوسێتی به‌سترا.

    کۆماری کوردستان له‌ هه‌رێمێکی رۆژهه‌ڵاتی کوردستان دامه‌زرا، به‌ڵام ئامانج و ئاواتی هه‌موو کوردی له‌خۆ گرتبوو. کۆمار به‌ ته‌ما بوو، پڕشنگی رووناکییە‌که‌ی بگاته‌ هه‌موو پارچه‌ و به‌شه‌کانی نیشتمانی داگیر کراو. هه‌ر بۆیه‌ ببووه‌ هێمای یه‌کبوونی نه‌ته‌وه‌ی کورد و ئازادیخوازانی کورد له‌ پارچه‌کانی دیکه‌ی نیشتمانه‌وه‌ به‌ پیر و هانایه‌وه‌‌ هاتن و کۆماریش باوه‌شی بۆ ئاواڵه‌ کردن.

هه‌موو ئه‌و ده‌سکه‌وتانه‌ ته‌نیا له‌ ماوه‌ی یازده‌ مانگ ته‌مه‌نی ده‌وڵه‌تی جمهوری کوردستاندا وه‌دییهاتن؛ ماوه‌یه‌ک که‌ بۆ خۆڕێکخستن و خۆ به‌ڕێوه‌بردنی نه‌ته‌وه‌یه‌ک ته‌نیا چرکه‌یه‌ک‌ له‌ مێژوو ده‌ژمێردرێ؛ ئه‌وه‌ش له‌ کردن نه‌ده‌هات ئه‌گه‌ر ژیریی و دڵسۆزیی گه‌وره‌ سه‌رکرده‌یه‌کی وه‌ک پێشه‌وا قازی محه‌مه‌د و پاڵپشتیی سەرکردیەکی وەک مەلا مستەفا بارزانی نه‌بایه‌.

به‌مجۆره‌ له‌ ژینگه‌ و پێکهاته‌یه‌کی کشتووکاڵی و خێڵه‌کییدا، کۆماری کوردستان ره‌شماڵی ده‌وڵه‌تی مۆدێڕنی نه‌ته‌وه‌یی بە سیسته‌می دیمۆکراسیی هه‌ڵدا و وه‌ک چرایه‌ک له‌ تاریکستانی دیکتاتۆریی شاهه‌نشاهی ئێران و تووتالیتاریزمی ناوچه‌که‌دا، دره‌وشایه‌وه‌ .

بەڵام مخابن، کۆماری کوردستان بوو به‌ قوربانیی به‌رژه‌وه‌ندیی زلهێزه‌کان و سیاسەتی جیهانی و سات و سه‌وداکانی رێژیمی داگیرکه‌ری تاران لەگەڵ ئوردوگای فرت و فێڵی ستالینی. ئاستی توانای کوردیش نه‌یتوانی هاوکێشه‌کان به‌ قازانجی خۆی رابگرێ و پیلان و ته‌ون و به‌سته‌ سیاسییه‌کان پووچه‌ڵ بکاته‌وه‌. سه‌ره‌نجام کۆمار ڕووخا؛ سه‌رۆک کۆمار و ژماره‌یه‌ک له‌ باشترین کاربه‌ده‌ست و ئه‌فسه‌رانی کۆمار له‌ مهاباد و بۆکان و سه‌قز له‌ لایان رێژیمی شا و 4ئه‌فسه‌ره‌که‌ی هه‌یئه‌تی ئازادییش، له‌ عێراق له‌ سێداره‌ دران. خه‌باتگێڕانی پارچه‌کانی دیکه‌ی کوردستانیش ماڵیان لێتێکچوو و په‌ڕه‌وازه‌ بوون.

    رووخانی کۆماری کوردستان گورزێکی کاریگه‌ری سیاسی و سایکۆلۆژی بوو له‌ کورد و ئاکام و خه‌ساری گه‌وره‌ و گرانی بۆ به‌ دواداهات. به‌م کەوتنە، ده‌سه‌ڵات و سه‌ر‌وه‌ریی سیاسی کورد شکستی هێنا و هه‌موو ده‌سکه‌‌وته‌کانی له‌ کیسچوون.

بێجگه‌ له‌وه‌ش ناسنامە و بزووتنه‌وه‌ی سیاسی کورد، له‌ جێی راسته‌قینه‌ی خۆیان ترازان، ئامانجی روونی “ئیستقلال و ئازادیی” لە نەتەوەیەک لێڵ کرا؛ ناسنامەی ئێرانیبوون بە بەر کورد دوورا و ئێرانچێتی و ئایدۆلۆژیای بێگانه‌ ترنجێنرایه‌ نێو‌ بزووتنه‌وه‌ی سیاسیی نەتەوەی کورد و ئه‌و بنه‌ما فکرییانه‌ی کۆمارییان له‌ سه‌ر بنیات نرا، کرچ و کاڵ بوونه‌وه‌‌ و بزووتنه‌وه‌ی رزگاریخوازیی نه‌ته‌وایه‌تی کورد له‌ رۆژ‌هه‌ڵاتی کوردستان، به‌ “ئێرانی” کرا. لەو ساوە رێڕەوی خەبات لە پێناو سەربەخۆیی و دامەزراندنەوەی دەوڵەتی جمهووریی کوردستان، گۆڕا بە حەولێکی بێئاکام بەڵام پڕ خەرج و قوربانیی لە رێگای “دێموکراتیزە کردنی ئێران”، لە جێی “ئیستقلال و ئازادیی”یەکەی قازی محەمەد کە لە مێژوو و ئازارەکانی کوردی هەڵگوێستبوو، کاڵای هاوردەی “دێموکڕاسی بۆ ئێران، خودموختاری بۆ کوردستان” بۆ کوردی داگیرکراوی بندەستی تاران، لە حیزبی توودە وەرگیرا.

سەرەڕای ئەو راستیانە و بەهەموو ئەو بایەخ و گرینگییەی ئەزموونی کۆماری کوردستان، مخابن حەقیقەت و ناوەڕۆک و ناسنامە و پەیامی کۆمار ئەو جۆرەی بووە، وەک خۆی نەگەیشتووەتە نەوەکانی پاش کۆمار و بە پەیڕەوی لە کاربەدەستانی یەکێتی سۆڤییەت و حیزبی توودەی ئێران، کەسایەتی راستەقینەی جمهووریی کوردستان لە لایان هێندێک کەس و حیزبی کوردییەوە، شێوێندراوە و لێکدانەوەی ناڕاست و دوور لە راستیی بۆ کراوە. لەو شێواندنەدا “دەوڵەتی جمهووریی کوردستان” بە “حکومەتی ناوچەیی” و “کۆماری خودموختار” لە چوارچێوەی ئێران دانراوە و تا ئاستی “ئەنجومەنە ئەیالەتی و ویلایەتییەکانی ئێران” نزم کراوەتەوە. هەروەها بە ناڕەوا ئامانج لە دامەزراندنی جمهووریی کوردستان “جێگیرکردنی دیمۆکراسی لە ئێران” دانراوە. سەرباری ئەوانەش، پێناسەکردنی دەوڵەتی جمهووریی کوردستان وەک کیانێکی سەربەخۆی سیاسیی بە “هەڵبەستراو و تۆمەتی دوژمنانی نەتەوەی کورد” دانراوە.

بۆیە پارتی ئازادیی کوردستان، بە ئەرکی بەردەوامی خۆی زانیوە کە بە پشت بەستن بە بەڵگە و دیکۆمێنتە رەسەن و راستەکان، هەموو ئەو شێواندنانە رەت بکاتەوە و پێ لەسەر ناو و ناوەڕۆک و چییەتی راستەقینەی کۆماری کوردستان وەک دەوڵەتێکی سەربەخۆی کوردستانیی دابگرێت. چوونکە رووداوە مێژووییەکانی هەر نەتەوەیەک بە توخمێک لە رەگەزەکانی ناسنامە (Identity)ی ئەو نەتەوەیە دادەنرێ. هاوکات دامەزراندنەوەی دەوڵەتی جمهووریی کوردستان بکاتە ستراتیکی خەباتی خۆی.

 کۆمیتەی ناوەندیی پارتی ئازادیی کوردستان لە لایان هەموو خەباتگێڕانی ریزەکانییەوە، بە بۆنەی ٦٨ هه‌مین ساڵوه‌گه‌ڕی دامه‌زراندنی ده‌وڵه‌تی جمهوری کوردستان، پیرۆزبایی له‌ گشت ڕۆڵه‌کانی نه‌ته‌وه‌ی کورد و تێکڕای کوردستانییه‌کان له‌ هه‌موو پارچه‌کانی کوردستان و له‌ تاراوگه‌ و لە هه‌موو هۆگران و رێبوارانی کۆماری کوردستان ده‌کا. هه‌زاران سڵاوی ئه‌مه‌گ و وه‌فا پێشکه‌شی پێشه‌وای شه‌هید و هه‌موو شه‌هیدانی کۆمار  ده‌کا و په‌یمانیان له‌گه‌ڵ نوێ ده‌کاته‌وه‌ که‌ تا وه‌دیهاتنی یه‌کجاریی په‌یام و ئاواته‌کانی ئه‌وان سه‌نگه‌ری خه‌بات و تێکۆشان به‌ر نه‌دا.

ده‌با یاد و بیره‌وه‌ریی دامه‌زراندنی ده‌وڵه‌تی جمهوری کوردستان هانده‌رمان بێ بۆ یه‌کختسنی ریزه‌کانمان و گوڕوتیندان به‌ تێکۆشان له‌ پێناو ئه‌ستاندنه‌وه‌ی خاک و ماف و سه‌روه‌رییمان.

با بیره‌وه‌ریی کۆماری سه‌روه‌ریی و سه‌ربه‌ستی، ئیلهامبه‌خشی خه‌باتمان بێ له‌ پێناو ئازادیی و سه‌ربه‌خۆیی و دامه‌زراندنه‌وه‌ی ده‌وڵه‌تی جمهووریی کوردستان.

 

پارتی ئازادیی کوردستان

کۆمیته‌ی ناوه‌ندی

2 رێبەندانی 2713

22 ژانویە 2014

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *