بەیاننامەی پارتی ئازادیی کوردستان PAK بە بۆنەی 71 هەمین ساڵوەگەڕی شەهید کرانی پێشەوا و هاورێکانی؛ رۆژی شەهیدانی کوردستان

71 ساڵ لە ئێعدامی پێشەوا قازی محەمەد سەرۆکی دەوڵەتی جمهوریی کوردستان و هاوڕێکانی لە لایان تارانەوە، تێپەڕ دەبێ. رووداوێک کە وەک برینێکی قووڵ لە سەر جەستە و گیانی نەتەوەی کورد، ماوەتەوە.
پێشەواقازی محەمەد پاش ٤ ساڵ خۆبەڕێوەبەریی ، گەیشتە ئەو باوەڕ و بڕیارەی کە لە چوارچێوەی دەوڵەتی ئێراندا، کورد بە مافەکانی ناگا. هەروەها ملی بەو گوشارانە نەدا کە کوردستان وەک ناوچەیەکی خودموختار بخرێتە چوارچێوەی حکومەتی ئازەربایجانەوە. سەرەنجام رۆژی2ی رێبەندان، 22 ژانوایەی 1946زایینی لە میتینگێکی 20000 کەسیی دا لە مهاباد، جیا بوونەوە لە دەوڵەتی داگیرکەری ئێران و سەربەخۆیی کوردستانی راگەیاند

و “بە خودا و بە کەلامی عەزیمی خودا، بە نیشتمان، بە شەرافەتی میللی کورد، بە ئاڵای موقەدەسی کوردستان” سوێندی خوارد کە” تا ئاخر هەناسەی ژیان و رژاندنی ئاخر تنۆکی خوێن”، ” بە گیان و بە ماڵ لە رێی راگرتنی سەربەخۆیی و بەرزکردنەوەی ئاڵای کوردستان”دا تێبکۆشی.
بەمجۆرە پێشەوا قازی محەمەد، بە دامەزراندنی دەوڵەتێ لە شێوازی کۆمارییدا لە دەرەوەی خاک و سەروەریی ئێران، بە ئاڵا و سروود و زمان و پێتەخت و ئەڕتەشی نەتەوەیی و پێوەندیی دەرەکی و ئابووریی سەربەخۆ، لە بەرانبەر دەوڵەتی شاهەنشاهی بە زمان و دامەزراوە و هێما و سیمبۆلەکانی خۆی ؛ سەروەریی ( Sovereignty) سیاسی کوردی وەدیی هێنا.
رووخاندنی دەوڵەتی جمهوری کوردستان و ئێعدامی سەرکۆمار، کارەساتێکی گەورە بوو بۆ نەتەوەی کورد و ئاکامی مادی و مەعنەویی و فکری زۆر تفت و تاڵی بە دوادا هات.
دەوڵەتی شاهەنشاهی ئێران بە زەبری لەشکرکێشی بۆ کوردستان، کۆمەڵگای سیاسیی هەڵبژێردراوی نەتەوەی کوردی بە شێوەی سیستەماتیک لە بەر یەک هەڵوەشاند، هێما و سیمبۆلەکان و دامەزراوە سیاسی وکولتورییە نەتەوەییەکانی کوردی دایە بەر پەلاماری توونا کردن و زمان و هێما و دام و دەزگا و دامەزراوەی بێگانە و داگیرکەری بە سەر کوردا سەپاند. هەروەها بە زەبری توند و تیژیی دەوڵەتیی، ترس و تۆقاندن و نیگەرانیی رۆحیی خستە سەر دڵی تاکەکانی ئەم نەتەوەیە. ئەم تاوانە هەروەها رێگای بۆ درێژە پێدرانی ژێنۆساید و کۆمەڵکوژیی نەتەوەی کورد لە رۆژهەڵاتی ناوەڕاست تەخت کرد.
رووخاندنی دەوڵەتی جمهوریی کوردستان و ئێعدامی قازی محەممەد، زەبرێکی ستراتیژیی لە گیانی نەتەوایەتی و خەباتی رزگاریخوازیی نەتەوەی کورد سرەواند. ئەم تاوانە پڕۆژەی ئاسمیلاسیۆن و ” بە ئێرانی کردن” ی نەتەوەی کوردی بووژاندەوە؛ ناسیۆنالیزمی ئازادیبەخشی کوردی تووشی پاشەکشە کرد؛ بواری پەرەگرتنی ئایدۆلۆژیای هاوردە و نامۆ لە گەڵ پرسی کوردی لە بزووتنەوەی رزگاریخوازیی کوردستان پێکهێنا؛ زۆر بەڵگە و بەڵگەنامەی نەتەوەیی کورد لە ناو بران و پاشان شتی ناڕاست و ساختە، بە ئامانجی تایبەت و دیاریی کراو، بۆ نەوەی ئێمە گوێزرایەوە.
سەرجەمی ئەم بارودۆخە، لادان لە بیر و سیاسەتی نەتەوەیی و سەرهەڵدانی قەیرانی ناسنامە و زاڵبوونی ئێرانچێتی بە سەر گوتاری رەسەنی کوردستانی و کێشە و دژبەریی ناڕەوای ناوخۆیی و بە فیڕۆدانی دەرفەتگەلی سیاسی و لە ئاکامدا خەسار بوونی بەشێکی گەورە لە هێز و توانای نەتەوەی کوردی لێکەوتەوە.
بیر و باوەڕ و رێبازی قازی محەمەد هەڵقوڵاوی ناسنامە، مێژوو، ئەزموون، پێویستی و دۆخی راستەقینەی نەتەوەی کورد بوو. پێشەوا پاش چەن جار هاتووچۆ بۆ تاران و وتووێژ لە گەڵ دەوڵەتی ئێران، بە ژیری و واقعبینیی بۆی دەرکەوت کە پرسی کورد لە چوارچێوەی ئێراندا چارەسەر ناکرێ. بۆیە بریاری مێژوویی راگەیاندنی سەربەخۆیی و دامەزراندنی دەوڵەتی جمهوریی کوردستانی دا.
ئێستا پاش ٧١ ساڵ لە رووخانی دەوڵەتی جمهووری کوردستان، ئەم راستییە هەر لە جێی خۆی ماوە کە: رێگا چارەی پرسی کورد و ستراتیژی دروستی بزووتنەوەی رزگاریخوازی کوردستان، سەربەخۆیی و پێکهێنانی دەوڵەتی نەتەوەییە. پارتی ئازادیی کوردستان ئاڵاهەڵگری لێبڕاوی ئەم ئامانجە و میراتگری بنەما فکری و سیاسییەکانی پێشەوا قازی محەممەد و دەوڵەتی جمهوری کوردستانە.
لە حەفتاویەکەمین ساڵوەگەڕی شەهیدکرانی پێشەوا و هاورێکانیدا، لە حاست گیانی پاکی ئەوان وهەموو شەهیدانی دەوڵەتی جمهوری کوردستان، سەری رێز دادەنەوێنین و وەک باشترین ئەمەگ و وەفاداریی پێیان، پەیمانی بەردەوامیی لە خەبات لە پێناو سەربەخۆیی کوردستان و دامەزراندنەوەی دەوڵەتی جمهووری کوردستانیان لە گەڵ نوێ دەکەینەوە.

سڵاو لە ناو و یاد و ئاڵا و ئامانجەکانی پێشەوا قازی محەممەد
شەکاوە بێ ئاڵای ئازادیی و سەربەخۆیی کوردستان

پارتی ئازادیی کوردستانPAK
کۆمیتەی ناوەندیی
8 ی خاکەلێوەی 2718
28ی مارسی 2018

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

دەتوانی ئەو تاگ و خەسڵەتانە HTML بەکاربێنیت: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>