بەیاننامەی پارتی ئازادیی کوردستان PAK بە بۆنەی حه‌فتاودوو هەمین ساڵوەگەڕی شەهید کرانی پێشەوا و هاورێکانی؛ رۆژی شەهیدانی کوردستان

ئێعدامی پێشەوا قازی محەمەد سەرۆکی دەوڵەتی جمهوریی کوردستان و هاوڕێکانی،پاش ٧٢ ساڵ، هه‌روا برینێکی قووڵه‌ لە سەر جەستە و گیانی نەتەوەی کورد و بزووتنه‌وه‌ رزگارییخوازییه‌كه‌ی.،
پێشەواقازی محەمەد پاش ٤ ساڵ خۆبەڕێوەبەریی دیفاكتۆ ، گەیشتە ئەو باوەڕ و بڕیارەی کە لە چوارچێوەی دەوڵەتی ئێراندا، کورد بە مافەکانی ناگا. هەروەها ملی بەو گوشارانە نەدا کە کوردستان وەک ناوچەیەکی خودموختار بخرێتە چوارچێوەی حکومەتی ئازەربایجانەوە. سەرەنجام رۆژی2ی رێبەندان، 22ژانوایەی 1946زایینی لە میتینگێکی 20000 کەسیی دا لە مهاباد،

جیا بوونەوە لە دەوڵەتی داگیرکەری ئێران و سەربەخۆیی کوردستانی راگەیاند و “بە خودا و بە کەلامی عەزیمی خودا، بە نیشتمان، بە شەرافەتی میللی کورد، بە ئاڵای موقەدەسی کوردستان” سوێندی خوارد کە” تا ئاخر هەناسەی ژیان و رژاندنی ئاخر تنۆکی خوێن”، ” بە گیان و بە ماڵ لە رێی راگرتنی سەربەخۆیی و بەرزکردنەوەی ئاڵای کوردستان”دا تێبکۆشی.
به‌مجۆره‌ پێشه‌وا قازی محه‌مه‌د، نه‌ هێز و توانای خۆی و نه‌ته‌وه‌كه‌ی له‌ كوێره‌ڕێی دێموكراتیزه‌ كردنی ئێران دا، به‌هه‌ده‌ر دا و نه‌ به‌ پرۆژه‌ و دروشمی بێگانه‌ و دوور له‌ ده‌رد و پرسی كورد، ریزی نه‌ته‌وه‌كه‌ی له‌ت و په‌ت كرد. راست به‌ په‌چه‌وانه‌وه‌، هه‌موو هێز و تواناكانی بۆ خه‌ڵك و خاكی كوردستان ته‌رخان كرد و ریزه‌كانی خه‌ڵكی كوردستانیشی به‌ پرۆژه‌ و ئامانجی ده‌وڵه‌ت و سه‌ربه‌خۆیی یه‌كخست.

پێشەوا قازی محەمەد، بە دامەزراندنی دەوڵەتێ لە شێوازی کۆمارییدا لە دەرەوەی خاک و سەروەریی ئێران، بە ئاڵا و سروود و زمان و پێتەخت و ئەڕتەشی نەتەوەیی و پێوەندیی دەرەکی و ئابووریی سەربەخۆ، لە بەرانبەر دەوڵەتی شاهەنشاهی بە زمان و دامەزراوە و هێما و سیمبۆلەکانی خۆی ؛ سەروەریی ( Sovereignty) سیاسی کوردی وەدیی هێنا.
رووخاندنی دەوڵەتی جمهوری کوردستان و ئێعدامی سەرکۆمار، کارەساتێکی گەورە بوو بۆ نەتەوەی کورد و ئاکامی مادی و مەعنەویی و فکری زۆر تفت و تاڵی بە دوادا هات.
دەوڵەتی شاهەنشاهی ئێران بە زەبری لەشکرکێشی بۆ کوردستان، کۆمەڵگای سیاسیی هەڵبژێردراوی نەتەوەی کوردی بە شێوەی سیستەماتیک لە بەر یەک هەڵوەشاند، هێما و سیمبۆلەکان و دامەزراوە سیاسی وکولتورییە نەتەوەییەکانی کوردی دایە بەر پەلاماری توونا کردن و زمان و هێما و دام و دەزگا و دامەزراوەی بێگانە و داگیرکەری بە سەر کوردا سەپاند. هەروەها بە زەبری توند و تیژیی دەوڵەتیی، ترس و تۆقاندن و نیگەرانیی رۆحیی خستە سەر دڵی تاکەکانی ئەم نەتەوەیە. ئەم تاوانە هەروەها رێگای بۆ درێژە پێدرانی ژێنۆساید و کۆمەڵکوژیی نەتەوەی کورد لە رۆژهەڵاتی ناوەڕاست تەخت کرد.
رووخاندنی دەوڵەتی جمهوریی کوردستان و ئێعدامی قازی محەممەد، زەبرێکی ستراتیژیی لە گیانی نەتەوایەتی و خەباتی رزگاریخوازیی نەتەوەی کورد سرەواند. ئەم تاوانە پڕۆژەی ئاسمیلاسیۆن و ” بە ئێرانی کردن” ی نەتەوەی کوردی بووژاندەوە؛ ناسیۆنالیزمی ئازادیبەخشی کوردی تووشی پاشەکشە کرد؛ بواری پەرەگرتنی ئایدۆلۆژیای هاوردە و نامۆ لە گەڵ پرسی کوردی لە بزووتنەوەی رزگاریخوازیی کوردستان پێکهێنا؛ زۆر بەڵگە و بەڵگەنامەی نەتەوەیی کورد لە ناو بران و پاشان شتی ناڕاست و ساختە، بە ئامانجی تایبەت و دیاریی کراو، بۆ نەوەی ئێمە گوێزرایەوە.
سەرجەمی ئەم بارودۆخە، لادان لە بیر و سیاسەتی نەتەوەیی و سەرهەڵدانی قەیرانی ناسنامە و زاڵبوونی ئێرانچێتی بە سەر گوتاری رەسەنی کوردستانی و کێشە و دژبەریی ناڕەوای ناوخۆیی و بە فیڕۆدانی دەرفەتگەلی سیاسی و لە ئاکامدا خەسار بوونی بەشێکی گەورە لە هێز و توانای نەتەوەی کوردی لێکەوتەوە.

ئێستا پاش 73 ساڵ لە رووخانی دەوڵەتی جمهووری کوردستان و 72 ساڵ له‌ ئێعدامی پێشه‌وا و هه‌ڤاڵه‌كانی، ئه‌و راستییە هەر لە جێی خۆی ماوە کە: رێگا چارەی پرسی کورد و ستراتیژی دروستی بزووتنەوەی رزگاریخوازی کوردستان، سەربەخۆیی و پێکهێنانی دەوڵەتی نه‌ته‌وه‌ییه‌. ئه‌وه‌‌ گه‌وهه‌ری رێبازی پێشه‌واو ده‌وڵه‌تی جمهووری كوردستانه و هه‌ر لێكدانه‌وه‌ و كه‌م و زیاد كردنێ لێی، شێواندن و لادانه‌ له‌ رێبازی پێشه‌واو كۆماره‌كه‌ی‌ .

لە حەفتاودووهه‌مین ساڵوەگەڕی شەهیدکرانی پێشەوا و هه‌ڤاڵه‌كانیدا، لە حاست گیانی پاکی ئەوان وهەموو شەهیدانی دەوڵەتی جمهوری کوردستان و سه‌رجه‌م شه‌هیدانی رێگای ئازادیی و سه‌ربه‌خۆیی كوردستان، سەری رێز دادەنەوێنین و وەک باشترین ئەمەگ و وەفاداریی پێیان، پەیمانی بەردەوامیی لە خەبات لە پێناو سەربەخۆیی کوردستان و دامەزراندنەوەی دەوڵەتی جمهووری کوردستانیان لە گەڵ نوێ دەکەینەوە.

سڵاو لە ناو و یاد و ئاڵا و ئامانجەکانی پێشەوا قازی محەممەد
شەکاوە بێ ئاڵای ئازادیی و سەربەخۆیی کوردستان

پارتی ئازادیی کوردستانPAK
10ی خاكه‌لێوه‌ی 2719ك
30ی مارسی 2019 ز

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *