بەیاننامەی پارتی ئازادیی کوردستانPAK بە بۆنەی بیست و حه‌وته‌مین ساڵی شەهید بوونی سەرکردەی هەڵکەوتوو سەعید یەزدانپەنا ؛ رۆژی شەهیدانی PAK

رۆڵەکانی نەتەوەی گەورەی کورد !
کوردستانییە وڵاتپارێزەکان

27 ساڵ له‌مه‌به‌ر، میراتگرانی پیاوخۆرەکانی ده‌رباری سەفەوی و بنەماڵەی پەهلەوی، کەسێکیان کردە ئامانجی له‌ ناوبردن کە خوێنی شێخ عوبەیدوڵلای نەهری و سمایل ئاغای سمکۆ و پێشەوا قازی محەمەد، لە دەمارەکانیدا دەگەڕا.
ئه‌وان شۆڕشگێڕێکیان تێرۆر کرد که‌ نەخشە ڕێگایەکی کێشا کە هەموو ئەو سام و هەیبەتە فکریی و سیاسی وسایکۆلۆژییەی نوخبەو رۆشنبیر ی ناسیۆنالیستی فارس و دەوڵەتی ئێران، بە هۆنینەوەی درۆ و جەعل و تەزویر و مێژوو سازیی، لە یەک سەدەی رابردوودا دەرخواردی خه‌ڵکیان دابوو ؛ دەشکێنێ و ناسنامەو کەسایەتی و باوەڕبەخۆبوون بۆ تاکی کورد دەگێڕێتەوە.ئه‌و سه‌ر‌كرده‌یه‌، سه‌عید یه‌زدانپه‌نا، رێبه‌ری پارتی ئازادیی كوردستان بوو.

سەعید یەزدانپەنا بە ئاوڕدانەوە لە پرسە جەوهەرییەکان، روانگە و سیاسەتی باوی بزووتنەوەی سیاسیی ” کوردستانی ئێران”ی لە هەڵگرتنی پارادۆکسی ناسنامەیی کوردبوون- ئێرانی بوون ، رەت کردەوە و پێی لەسەر کوردستانی بوون داگرت. ئەو لەم کارەدا لە وەرگرتنی مەدالیای ” جیاوازی خوازیی ” نەترسا و رایگەیاند کە : ” بەداخەوە تا ئێستا هێزە پێشکەوتوو خوازەکانی کوردستانی ئێران، هەم خۆیان بە ئێرانی زانیوە هەم کوردستانی، هەر بەو پێیەش هەڵوێست و دروشمیان رەچاو کردووە. ئێمە دەمانەوێ ئەو سامە بشکێنین و بە راشکاوی بڵێین: کوردین و خەڵکی وڵاتی داگیرکراوی کوردستانین. هەڵوێستمان لە سەر ئەو ئەساسە دیاری دەکەین، بەبێ ترس و لەرزی سیاسی لەوەی پێمان بڵێن تەجزییە تەڵەب ” .
تاران که‌ لە دامەزراندنی دەوڵەتی ناسیۆنالی فارسه‌وه‌، سیاسەتی ئاسمیلەکردن و فارسیفیکاسیۆن و شێواندن و گۆڕینی ناسنامەی نەتەوەیی کوردی بە شێوەی سیستماتیک پەیڕەو کرد بوو و بزووتنەوەی سیاسی کوردیش لەپاش رووخاندنی دەوڵەتی جمهووری کوردستانەوە، خرابووه‌ سه‌ر کوێره‌ رێی ” ئێرانیبوون” ؛ سەعید یەزدانپەنا ، یەکبوونی نەتەوە و پرسە سیاسییەکەی وه‌ک مه‌سه‌له‌یه‌کی واحید لە ڕۆژهەلاتی ناوەڕاست دا خستەڕوو: ” گەلی کورد بە درێژایی چەندها ساڵ بەخەبات و ڕاپەڕین دژ بەداگیرکەرانی کوردستان نیشانی داوە کە کورد یەک نەتەوەیە و خەباتەکەشی لە بنەڕەتدا بۆیەک مەبەستە، یانی لە راستیدا خەباتی گەلی کورد بەگشتی ناوەڕۆکی رزگاریخوازانەی هەیە . بەم مانایە، کە ئامانجی ئەو خەباتە کۆتایی هێنان بە داگیرکردنی کوردستان و وەدیهێنانی مافی دیاری کردنی چارەنووسی ئازادانەی خۆیەتی، ئەوەش بەو مانایەیە کە بەگشتی مەسەلەی کورد مەسەلەیەکی واحیدە”.
لە کاتێکدا هیچ پلان و نەخشەرێیەک بۆ دەرباز بوونی کورد لە تەوقی سنوورە دەسکردەکان لە دەزگای فکری و سیاسی حیزبەکانی ” کوردستانی ئێران” دا بوونی نەبوو و لە گوتار و ئامانج و سیاسەتی باو و جێکەوتووی رۆژهەڵاتدا، هەرگیز نەدەبوو کورد بیر لە سەربەخۆیی و پێکهێنانی دەوڵەت بکاتەوە و لە ژێر ناوی” واقع بینی سیاسی” دا، مەحکووم بوو بە ژیان لە ناو دەوڵەتی ئێران و ملکەچیی نەتەوەی فارس ؛ سەعید یەزدانپەنا 27 ساڵ لەمەوبەر، ڕاسان له‌ واقیعه‌ تفت و تاڵه‌کان و گۆڕینیان بە ئیرادەی نەتەوەکان، مومکین دەبینێ: ” کاتێ کە دیواری بەرلین وەکوو سیمبولی دەورانی شەڕی سارد دەرووخێ و ئەو سنوورە دەستکردە، هەڵدەگیرێ، بەومانایەیە کە ڕێگە خۆش دەبێ بۆئەوەی ئەو سنوورانەی بە پێچەوانەی ویستی خەڵکی ئەو وڵاتانە بەسەریاندا سەپاوە، هەڵدەوەشێنەوە”.
لەو دەمەدا کە، ڕۆژهەلاتی کوردستان گوتار و ستراتیژییەکی بێجگە لە خودموختاری نەدەناسی ، سەرکردەی لاوی ئێمە، ئاڵای خەبات بۆ سەربەخۆیی و بەدەوڵەتبوونی کوردستانی هەڵکرد: “بزووتنەوەی ڕزگاریخوازی کورد لە ئێران، ئەبێ هەڵگری درووشمی مافی دیاریکردنی چارەنووس بێت. مافی چارەنووس لە بنەڕەتدا بە مانای مافی پێکهێنانی دەوڵەتی سەربەخۆی نیشتیمانیە. مەسەلەی کورد چی دیکە لە چوارچێوەی بەر تەسکی وڵاتێکدا نابەسترێتەوە، بەلکوو وەک مەسەلەی نەتەوەیەکی 25 میلیونی دیتە گۆڕێ، مەگەر ئەوەی کە ئێمەی کورد بۆخۆمان چوارچێوەی مەسەلەکە بەرتەسک بکەینەوە. لە بارودۆخێکی ئەوتۆدا، ستراتیژی جووڵانەوەی رزگاریخوازی کورد دەبێ پێکهێنانی دەوڵەتی سەربەخۆی کوردستان بێت”.
٢٧ ساڵ لەمەوبەر کە هێزەکانی بزووتنەوەی سیاسیی کورد لەهەر پارچەیەکی کوردستان، تەنیا بە خۆیان و ئەرکی تایبەتی ئەو پارچەیەوە خەریک بوون، بیر و رێبازی سەعیدی یەزدانپەنا، سنوورە داتاشراوەکان و چەمکە چەقبەستووەکان دەبەزێنێ و تێزی پێکهێنانی “ئۆرگانی یەکگرتووی کوردستانی” و ” نوێنەرایەتی سیاسیی ـ نەتەوەیی” دێنێتە گۆڕێ: ” ئێستا کاتی ئەوە هاتووە کە هێزە سیاسییەکانی کوردستان بە گشتی بتوانن لەم باروودۆخە ڕەخساوە دا ئۆرگانێکی یەکگرتووی کوردستانی بۆ گەشەدان بە خەباتی رزگاریخوازانەی گەلەکەمان لە ئاستی نێونەتەوەییدا پێک بێنن. ئەرکی سەرەکی ئەم ئۆرگانه‌ ئەوە دەبێ کە لە کۆڕ و کۆمەلگای نێونەتەوەیی دا مەسەلەی کورد وەکوو مەسەلەی نەتەوەیەکی ٢٥ میلیونی بێنێتە گۆڕێ. بە واتایەکیتر نوێنەری سیاسیی ـ نەتەوەیی کورد بێ لە ئاستی جیهاندا.”
لە دۆخێکدا کە جەمسەرەکانی ئەوکاتەی بزووتنەوەی سیاسی ” کوردستانی ئێران” ، هاوکات لە گەڵ شەڕ و ململانێی خوێناویی له‌ گه‌ڵ یەکتر ،یەکیان لە حەولی “پێکهێنانی بەرەی دیمۆکراتی دژی ئەمپریالیستی هێزە ئێرانییەکان” و ئەوی دیکەیان لە یۆتوپیای “کۆمۆنیزمی کرێکاریی ئێران” دا، وزە و هەستی مرۆڤی کوردیان بە هەدەر دەدا ؛ سەعید یەزدانپەنا، پڕۆژە و بژاردەی پێکهێنانی بەرەی یەکگرتووی کوردستانیی خستەڕوو: “بۆ ئێمە وەک کورد لە ئێران، بەهەموو هێز و تاقم و دەستەیەکی سیاسیی شۆڕشگێڕ و دیمۆکرات و پێشکەوتنخوازەوە، یەکخستنی ریزەکانی خەباتمان لەپێش هەموو پێویستییەکی سیاسیی دیکەوەیە… دەبێ لەسەر زەروورەتی پێکهێنانی بەرەی کوردستانی هەر وەک خاڵێکی ستراتیژیک قامک دابنێین.”
ئەوەندەی بۆ پێوەندییە دەرەکییەکانی بزووتنەوەکەش دەگەڕایەوە، لە کاتێکدا کە بە شێوەیەکی گشتی پێوەندییەکان لە سەر بنەمای ئایدۆلۆژیک رۆنرا بوون، سەعید یەزدانپەنا، تێزی دیپلۆماسیی نەتەوەیی خستەڕوو: ” لەڕووی نێونەتەوەییەوە خەباتی رزگاریخوازیی کورد ئەبێ سیاسەتێکی دیپلۆماتیکی روون و ئاشکرای هەبێ… خەباتی رزگاریخوازیی گەلی کورد دەبێ سەرنجی هەموو ئەحزاب، رێکخراوە نێونەتەوەییەکان و دەڵەتان لە ئاستی جیهانیدا بۆلای کێشەی رەوای کورد رابکێشی بەبێ سەرنجدانە سەر ناوەڕۆکی چینایەتی- سیاسییان.”
یەکخستنی هێزی پێشمەرگە، یەکێکی دیکە لەو پڕۆژانە بوو کە شەهید سەعید هێنایە گۆڕێ: “هێزی پێشمەرگەی کوردستان… لەکاتی گەشە و پێشڕەوی و پێکهاتنی بەرەی کوردستانیی، دەکرێ و دەبێ لەبەر فەرماندەییەکی واحیدا رێکبخرێ و سازمان بدرێ.”
بەمجۆرە، سەعید یەزدانپەنا و حیزبەکەی، 27 ساڵ لەمەوبەر وەرچەرخان و گۆڕانیان لە پێناسە، ناسنامه‌، گوتار، ئامانج ، دروشم، پرۆەژەی سیاسی، هێماکان و تێرم و ئەدەبیاتی سیاسیی و پارادایمی باو لە ڕۆژهەلاتی کوردستان پێکهێنا . لە 27 ساڵی ڕابردوودا، هیچ لایەنێکی سیاسیی لەدەرەوەی داهێنانه‌كانی پارتی ئازادیی كوردستان، هیچ داهێنان و ئاڵوگۆڕێکی لە بزاڤی سیاسیی کوردستاندا نەکردووە هەر گۆڕانێکیش کە هێزێکی سیاسیی لە ڕوانگە و ئامانج و دروشم و ئەدەبیاتی سیاسیی خۆیدا کردبێتی، هه‌ر له‌ ناو ئه‌و چوارچێوەیەدا بووە کە شەهید سەعید و پارتی ئازادیی كوردستان، پێشەنگ و ڕەچەشکێنی بوون.
ئاڵای خەبات و ئامانجەکانی شه‌هید سه‌عید، بە مەرگی ناوەختی، لە شەکانەوە نەکەوت. هاوڕێ وەفادارەکانی ، جوامێرانە درێژەیان بە خەبات لە پێناو وەدیهێنانی ئامانجەکانی ئەو دا و ئەو کار و پڕۆژانەی ئەو نەپەرژایە سەریان، ئەوان تەواویان کرد. رێبوارانی رێبازەکەی شێلگیرانه‌ له‌ خه‌بات و داهێنان بەردەوام بوون تا ئەو نەمامە ساوایەی سەعید یەزدانپەنا ناشتی، بەژن و باڵای کرد و بووە هێزێکی خاوەن ناسنامە، خاوەن پرس و پەیام، خاوەن ئەرک و خاوەن فەلسەفەی بوون کە جیاوازییەکانی لەگەڵ “ئەوانی دیکە”، تۆخ و رۆشن و گەوهەرییە.

لە 27 ساڵی ڕابردوودا به‌ دوای شه‌هید سه‌عیدی رێبه‌رمان، کاروانێکی دوور و درێژ لە رێبوارانی رێبازەکەی لە بەرەنگار بوونەوەی هێزە داگیرکەرەکانی بەرفەرمانی تاران لە سەر خاکی رۆژهەڵاتی داگیرکراو، یان لە بەرەنگار بوونەوەی دەوڵەتی تێرۆریستیی خەلافەی داعش، یان له‌ نه‌به‌ردی مێژوویی پردێ و له‌ به‌ره‌نگاربوونه‌وه‌ی سوپاكانی تاران و به‌غدا دا، خوێنی پاکیان رژا و گیانیان بەختی سەربەخۆیی نیشتمان و نەتەوە کرد.
ئەمڕۆ لە رۆژی شەهیدانی پارتی ئازادیی کوردستاندا، سەری رێز لە حاست گیانی پاکی رێبەر و هەڤاڵانی شەهیدمان دادەنوێنن و مۆمی زیندوو راگرتنی یادیان دادەگیرسێنینەوە و بەڵێنی کۆڵنەدان و سوور بوون لەسەر خەبات تا وەدیهێنانی سەربەخۆیی کوردستانیان پێدەدەینەوە.
هەروەها سڵاو دەنێرین بۆ بنەماڵەکانیان و دڵنیایان دەکەینەوە کە خوێنی رۆڵە و باوک و خوشک و براکانیان بە فیڕۆ ناچێ و دەبێتە مەشغەڵ و وزەی خەبات لە پێناو ئازادیی و سەربەخۆیی کوردستان و هه‌ڵکردن و شه‌کانه‌وه‌ی ئاڵای پیرۆزی کوردستان له‌ سه‌رانسه‌ری نیشتمان.
ئێوەش ئەی رۆڵەکانی کورد، لە هەر کوێ هەن بەهەڵکردنی ئاڵای کوردستان یان داگیرساندنی مۆمێک، یان به‌ دادانی فاتێحایەک،یان خوێندنی دۆعای خاک، یان چڕینی ئەی ڕەقیبێک، بە ساتێک ڕاوەستان یان سەردان لە ماڵە شەهیدێک، رێز بگرن لە رۆڵەی هەڵکەوتووی کورد سەعید یەزدانپەنا و شەهیدانی ڕێگای ئازادیی و سەربەخۆیی کوردستان.

پارتی ئازادیی کوردستانPAK

28 خەرمانانی 2718
19 سێپتامبری 2018

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

دەتوانی ئەو تاگ و خەسڵەتانە HTML بەکاربێنیت: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>