(حوسێن یەزدانپەنا)پێشمەرگە 70 كیلۆمەتر داعشی لە كەركووك دوور خستووەتەوە‌.. ڕاوەدوونانیان بەردەوامە

كەركووك-KDP.info- فەرماندەیەكی هێزی پێشمەرگەی كوردستان دەڵێت، مەترسیی داعش لە شاری كەركووك نەماوە و بە درێژایی 70 كیلۆمەتر لە دەوروبەری شار دوور خراونەتەوە.

(حوسێن یەزدانپەنا) فەرماندەی هێزی پێشمەرگەی كوردستان لە قەڵای ڕۆژهەڵات، بە ماڵپەری فەرمیی پارتیی دیموكراتی كوردستانی ڕاگەیاند: “داعش لە شاری كەركووك لە زۆر شوێن پاشەكشەیان كردووە و چوونەتە حاڵەتی متبوونەوە، لە كاتێكدا هێرشی پێشمەرگە بەرەو ئامانجەكانی هەنگاو دەنێت و تا ئێستاش پانتاییەكی زۆریان لێ وەرگیراوەتەوە و زیانێكی گەورەیان لێ دراوە”.

(یەزدانپەنا) گوتیشی: “چەكی پێشمەر‌گە بە بەراود لەگەڵ ڕابردوو زۆر جیاوازە، پێشمەرگە لە حاڵەتی هێرشكردنە و داعشیش لە بەرگریدان، چونكە لە ماوەی چەند ڕۆژی ڕابردوودا پێشمەرگە بە پارتیزانی چوونەتە سەر بارەگاكانیان، لەلایەكی دیكەوە و لە ڕووی سیاسییەوە پڕۆژەی داعش دژی كورد شكستی هێناوە، ئێستایش لە پاشەكشەدان و شەڕ ناكەن”.

ئەو فەرماندەیەی هێزی پێشمەرگەی كوردستان لە قەڵای ڕۆژهەڵات دەشڵێت، “داعش ئێستا شەڕی بەرانبەر بە پێشمەرگە دۆڕاندووە، بەڵام لە ڕووی سەربازییەوە ئێمە حاڵەتەكە وا دادەنێین كە هەر كاتێك دەرفەتیان هەبێت هێرش دەكەن، بەڵام ئێمەیش دەستیان لێ ناپارێزین و تەفروتونایان دەكەین”.

ئەوەیشی خستە ڕوو، داعش تەنیا لە كەركووك لە حەویجەیە، پێشتر 30 كیلۆمەتر لە كەركووكەوە دوور بوو، بەڵام ئێستا پێشمەرگە 70 كیلۆمەتر داعشی لە دەرەوەی شاری كەركووك پاشەكشە پێ كردووە.

كارزان هەورامی

http://www.kdp.info/a/d.aspx?l=13&a=80139

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *