راگه‌یه‌ندراوی رێکخراوی ئازادیی ژنانی کوردستان – نینا به‌ بۆنه‌ی رۆژی جیهانی منداڵ

به‌ بۆنه‌ی رۆژی جیهانی منداڵ به‌ ناوی سکرتێری رێکخراوه‌که‌مان و هه‌موو ژنانی ریزه‌کانی رێکخراوی ئازادیی ژنانی کورستان-نینا پیرۆزباییه‌کی گه‌رم له‌ سه‌رجه‌م منداڵانی جیهان به‌ گشتی و منداڵانی کورد به‌ تایبه‌تی ده‌که‌ین. ئاواته‌ خوازین به‌رز راگرتن و یادکردنه‌وه‌ی ئه‌م بۆنه‌یه‌ ببێته‌ هه‌وێن و هانده‌ری باشتر بوونی ژیان و گوزه‌رانی منداڵانی بێده‌ره‌تان و لێقه‌وماوی سه‌رجه‌م مرۆڤایه‌تی له‌ هه‌موو گۆشه‌ و سووچێکی ئه‌م جیهانه‌.

قوناغی منداڵی سه‌ره‌تایه‌کی گرینگ و هه‌ستیاره‌ له‌ ژیانی مرۆڤدا که‌ تایبه‌تنه‌ندییه‌کی جیاوازی سایکۆلۆژی له‌ چاو قۆناغه‌ سرووشتیه‌کانی دیکه‌ی وه‌ک مێرمنداڵی و هه‌رزه‌کاری و لاوێتی تا قوناغی جوامێری و دواتر که‌سانی به‌ ساڵاچوودا هه‌یه.‌
ئه‌وه‌ی ئه‌م قۆناغه‌ جیا ده‌کاته‌وه‌ له‌ قۆناغه‌کانی دیکه‌ی ژیانی مرۆڤ، ئه‌و ناسنامه‌ و که‌سایه‌تییه‌ کۆمه‌ڵایه‌تییه‌یه‌ که‌ له‌ قۆناغی منداڵیدا له‌ زه‌ین و مێشکی مرۆڤدا ده‌چه‌سپێ و داهاتوو و چاره‌نووسی ئه‌و که‌سه‌ ده‌سنیشان ده‌کا. به‌ داخه‌وه‌ سه‌ره‌ڕای هه‌ستیاری ئه‌م قۆناغه‌ له‌ ژیانی مرۆڤدا هێشتا به‌شێکی زۆر له‌ کۆمه‌ڵگاکان به‌ تایبه‌تی له‌ وڵاتانی دواکه‌وتوو و رۆژهه‌ڵاتیدا، ره‌چاوی په‌روه‌رده‌ و بارهێنانی مناڵ به پێوه‌ر و بنه‌ماکانی ئه‌م سه‌رده‌مه‌ ناکه‌ن و ئه‌وه‌ش ده‌بێته‌ هۆکاری سه‌رهه‌ڵدانی کێشه‌ کۆمه‌ڵایه‌تییه‌کان و له‌ ئاکامدا‌ تێکچوونی شیرازه‌ی خێزان و کۆمه‌ڵگه‌.
له‌گه‌ڵ ئه‌وه‌شدا که‌ کۆر و کۆمه‌ڵه‌ نێوده‌وڵه‌تییه‌کانی مافی مرۆڤ و دامه‌زراوه‌کانی تایبه‌ت به‌ مناڵان، گرینگییه‌کی تایبه‌تی به‌ مناڵ و کێشه‌کانی ده‌ده‌ن، به‌ڵام له‌ ئاکامی دۆخی سیاسی و ئابووری و کۆمه‌ڵایه‌تی زۆربه‌ی وڵاتانی جیهان، هێشتا زۆربه‌ی ئه‌و کۆمه‌ڵگایانه‌ گیرۆده‌ی کێشه‌کانی منداڵانن، به‌ تایبه‌تی کێشه‌کانی که‌می خۆراک و ده‌وا و ده‌رمان و نه‌خۆشییه‌ کوشه‌نده‌کان و ئه‌و نه‌خۆشیانه‌ی ده‌بنه‌ هۆکاری تێکچوونی باری جه‌سته‌یی و هزری منداڵان.
منداڵانی کوردستان وه‌ک هه‌موو چین و توێژه‌کانی دیکه‌ی وڵاته‌که‌مان، به‌ر له‌ هه‌موو شتێک قوربانی دۆخی سیاسی کوردستانن، دابه‌شکران و داگیرکرانی کوردستان له‌ لایه‌ن دوژمنانی نه‌ته‌وه‌که‌مان ده‌ره‌تانی له‌ گه‌شه‌ و نه‌شه‌ی منداڵی کورد له‌ رووی کۆمه‌ڵایه‌تی و له‌شساغییه‌وه زه‌وت کردووه‌‌. له‌ لایه‌کی دیکه‌وه‌ کێشه‌ کۆمه‌ڵایه‌تییه‌کانی دیکه‌ی نێو خێزانی کورد وه‌ک هه‌ژاری و بێ داهاتی و هه‌ڵوه‌شانه‌وه‌ی خێزان و … هتد ئه‌وه‌نده‌ی دیکه‌ باری منداڵی کوردی قورستر کردووه‌ و هه‌ره‌شه‌ له‌ ژیان و چاره‌نووسی ده‌کا.
رێکخراوی ئازادیی ژنانی کوردستان له‌م بۆنه‌یه‌دا جارێکی دیکه‌ داوا له‌ رێکخراوی نه‌ته‌وه‌ یه‌کگرتووه‌کان و کۆڕ و کۆمه‌ڵه‌ نێوده‌وڵه‌تییه‌کانی مافی مرۆڤ و دامه‌زراوه‌ تایبه‌تییه‌کانی به‌رگری له‌ مافی منداڵان ده‌کا، میکانیزمی پێویست بۆ به‌رگری له‌ ناسنامه‌ و که‌سایه‌تی منداڵان له‌ سه‌رله‌به‌ری جیهان بگرنه‌ به‌ر و چیدیکه‌ رێگه‌ به کووژران و ئازار و ئه‌شکه‌نجه‌ و برسێتی و نه‌خۆشی منداڵان به‌ بیانووی جۆراوجۆر نه‌ده‌ن. پێویسته‌ مناڵان به‌ هیچ بیانوویه‌ک له‌ ژێر کاریگه‌ری دۆخی خراپی ئابووری خێزان نه‌خرێنه‌ به‌ر کار و ژینگه‌یه‌کی ئارام و ئاسووده‌ و دوور له‌ هه‌ر جۆره‌ هه‌ڕه‌شه و چه‌وسانه‌وه‌یه‌کیان بۆ دابین بکرێ و بتوانن سوودمه‌ند بن له مافی خوێندن و‌ هه‌موو ئه‌و ماف و ئازادییانه‌ی ده‌بنه‌ هۆکاری پاراستن و گه‌شه‌ و هه‌ڵدانی منداڵان.
به‌ڕێزه‌وه‌
رێکخراوی ئازادیی ژنانی کوردستان –نینا
1 ژووئه‌نی 2014
12 جۆزه‌ردانی 2714

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *