راگەێندراوی PAK بە بۆنەی رۆژی جیهانیی زمانی دایکیی

“نه‌ته‌وه، زمان و نیشتمانه‌كه‌مان، به‌ ده‌وڵه‌ت و سه‌روه‌ریی، له‌ هه‌ڕه‌شه‌كان، رزگار ده‌بێ”.

زمان لە توخمە بنچینه‌ییه‌كانی ناسنامەی تاک و کۆی نەتەوەیه‌. هه‌روه‌ها سیمبۆلی یەکێتی نەتەوەیی و فاکتەرێکی سەرەکی لە پڕۆسەی پێکهاتنی دەوڵەتە نەتەوەییەکانه‌. هاوكات ده‌ورێكی بنه‌ڕه‌تی له‌ دیاری کرانی تخووب و سنوورە جوغرافییەکاندا هه‌بووه‌. زمانی دایکیی، بەهێزترین ئاڵقەی پێوەندی و لێکتێگەیشتنی نێوان تاکەکانی نەتەوە پردی پێکبەستنەوەی رابردوو، حاڵ و داهاتووی ئەو نەتەوەیەیە. زمان بەشێکە لە تەواوکاری و پەرەسەندنی مرۆڤیی کۆمەڵگاکان. 

زمانی كوردی وه‌ك زمانی نه‌ته‌وه‌یه‌كی ٥٠ میلیۆنی لە رۆژهەڵاتی ناوەڕاست، به‌ ئامانجی توانه‌وه‌ی ئه‌م نه‌ته‌وه‌یه‌، به پڕۆژه‌ی سیسته‌ماتیكی ئاسمیلاسیۆن و به‌ پشت به‌ستن به‌ هێزی ره‌ق و نه‌رم، له‌ به‌ر حەول ه‌ هێرشی لەناو بردندا بووه‌ و هه‌یه‌. کورد لەو دەوڵەتانەدا کە بە سەریاندا دابەشکراوە، زمانی داگیرکەرەکەی لێکراوەتە “فەرمی” یان “هاوبەش” و خوێندن و نووسین بەو زمانانەی بەسەردا سەپێندراوە.
لە ئێران 90 ساڵە زمانی فارسی ، بەسەر نەتەوەی کوردا، سەپێندراوە. 90 ساڵە دەوڵەت و دام و دەزگاکانی بۆ تواندنەوەی کورد و زمانەکەی و ” بە ئێرانی کردن” ی ، بە شێوەی سیستەماتیک لە گەڕدان. دەسەڵاتی حاکم و تەنانەت رێکخراوە فارسییەکانی بەرهەڵستکاری حکومەت، ئەم زمانە بە زمانی فەرمی، یان لە باشترین حاڵەتدا بە “زمانی هاوبەش” و به‌رهه‌می” همزیستی” ناودەبەن. لەحاڵیکدا، بە زەبر و زەنگ و لۆژیکی پێوەندیی نێوان داگیرکەر و داگیرکراو، سەپێندراوە و هیچ هاوبەشییەک لە نێوان ئەو زمانە و نەتەوەی کوردا نییە.
رۆڵەکانی نەتەوەی گەورەی کورد، چ لە رێگای بەرپاکردنی شۆرش و راپەڕینەوە، چ بە ئافراندنی موسیقای ره‌سه‌نی وه‌ك به‌یت و حه‌یران و مه‌قامات و خوڵقاندنی ده‌قی ئەدەبیی نووسین و وەرێخستنی کاروانی رۆژنامەگەری کوردی، زمانی کوردییان نەک هەرپاراست بەڵکوو لە چاو هەڕەشەکانی سەری، قۆناغ بە قۆناغ گەشەیان پێداو و ئەمڕۆ کورد و زمانەکەی وەک نەتەوە و زمانێکی زیندوو لە ریزی نەتەوە و زمانەکانی دیکەی دنیادا دەبینرێن.
کورد لە رۆژهەڵاتی کوردستان، هەر لە سەردەمی بنیاتنانی دەوڵەت – نەتەوەی رەزاخانی لە ئێران، لە هەر دەرفەتێک بۆ پچڕاندنی ئەو کوت و بەندە خەباتی کردووە. راپەڕینی سمکۆی نەمر، تێكۆشانی ژێكاف و دامەزراندنی دەوڵەتی جمهوری کوردستان و خه‌باتی سه‌ربه‌خۆییخوازیی پارتی ئازادیی كوردستان له‌ سێ ده‌یه‌ی رابردوودا ، ئاڵقەکانی ئەو زنجیرە تێکۆشانەن. زمانی كوردی و نه‌ته‌وه‌ی كورد و كۆمه‌ڵگا و نیشتمانه‌كه‌ی، ته‌نیا به‌ دامه‌زراندنی ده‌وڵه‌ت و هه‌بوونی سه‌روه‌ریی سیاسیی، به‌ یه‌كجاریی له‌ بن هه‌ڕه‌شه‌ زۆر و فره‌ڕه‌هه‌نده‌كان، رزگار ده‌بێ.
بۆیه‌ رۆژی زمانی دایکیی، دەرفەتێکە بۆ ئەوەی رۆڵەکانی نەتەوه‌ی کورد، ئیرادەی خۆیان لەسەر پاراستنی زمان و ناسنامەی سەربەخۆ و خه‌بات له‌ پێناو سه‌ربه‌خۆیی و سه‌روه‌رییدا، به‌هێزتر بكه‌ن.
ئەم بۆنەیە دەرفەتێکە بۆ ئەوەی نەتەوەی کورد لە رۆژهەڵاتی کوردستان بە وێنەی کیبک وکاتالون و سکاتلەندییەکان و باشووری كوردستان، رێفراندۆمی دیاریکردنی چارەنووسی سیاسی، بکاتە داوا و پڕۆژەی سیاسیی سەرەکیی خۆی.

پارتی ئازادیی کوردستانPAK
کۆمیتەی ناوەندیی
2 ڕه‌شه‌مه‌ی 2718
21 فەوریەی 2019

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *