رۆژی کرێکار لە روانگەی ناسییۆنالیزمی کوردەوەبه‌یاننامه‌ی پارتی ئازادیی کوردستانPAK به‌بۆنه‌ی رۆژی جیهانیی کرێکار

لە کاتێکدا کرێکارانی ئەو وڵاتانەی سەرچاوەی سەرهەڵدانی بزووتنەوەی کرێکاریی و دیاریی کرانی رۆژی یەکی ئایاربە رۆژی جیهانیی کرێکارن، لە ناو دەوڵەتیی نەتەوەیی و نیشتمانیی خۆیاندا بە ئاستێکی بەرز لە مافە تایبەتیەکانیان گەیشتوون و لە ئاسایش و بەختەوەرییدا کار و ژیان بەسەر دەبەن؛ کرێکاران و زه‌حمه‌تکێشانی کوردستان لە ژێر باری ئاکامه ‌تاڵه‌کانی داگیرکران و بێدەوڵەتییدا، نە وەک مرۆڤ ژیانیان پارێزراوە و نە وەک کرێکار مافەکانیان دابین کراوە. کوشتاری بەردەوام و بێپسانەوەی کۆڵبەرانی کوردستان کە بەشێکی فراوانن لە چینی کرێکار و زەحمەتکێشی کورد، سێمبۆلی دۆخ و ژیانی چینی کرێکار و زەحمەتکێشی کوردە لە ژێر سەروەریی سیاسیی( حاکمیت) تاران دا.

حاکمیەتی داگیرکەرانەی تاران و دزین و به‌تاڵانبردنی سه‌روه‌ت و سامانی نه‌ته‌وه‌یی کورد و رێگریی لە پێشکەوتنی ئابووریی، زیاتر له‌هه‌مووان له‌سه‌ر پیلی کرێکاران و زەحمەتکێشانی مێشک و بازووی کورد، ‌قورسایی ده‌کا. سه‌روه‌ت و سامانێ که ئه‌گه‌ر بۆ خاوەنانی راسته‌قینه‌ی واتە رۆڵەکانی ئەم نەتەوەیە بگه‌ڕێته‌وه‌، ده‌توانێ ببێته بناخه‌ی ئابوورییه‌کی پێشکه‌وتووی نه‌ته‌وه‌یی و دابینکردنی دادپه‌روه‌ریی کۆمه‌ڵایه‌تی و به‌خته‌وه‌ریی هه‌موو کوردستانییان.
لەگەڵ ئەوەدا کە تێکۆشانی کرێکاران و زەحمەتکێشانی کوردستان بۆ دابینکردنی هەر رادە لە مافە تایبەتییەکانیان لە هەر هەلومەرجێکدا حەولێکی رەوا و بەرحەق و جێی پشتیوانییە، بەڵام ئەزموونی نەتەوەکان و کۆمەڵگاکانی مرۆڤایەتی سەلماندوویە کە بەختەوەریی کرێکاران و زەحمەتکێشانی هەر نەتەوەیەک بەندە بە بارودۆخی گشتیی ئەو نەتەوەیەوە. کرێکاران و زەحمەتکێشانی نەتەوە بندەست و بێدەوڵەتەکان هەرگیز ناتوانن لەگەڵ هاوچینەکانیان لە ناو نەتەوە ئازاد و خاوەن دەوڵەتەکاندا، وەک یەک بن. کرێکاران و زەحمەتکێشانی هەر نەتەوەیەک تەنیا لەناو دەوڵەتی نەتەوەیی خۆیاندا بەستێن و دەرفەتەکانی گەیشتن بە مافە تایبەتییەکانیان وەدەست دەهێنن. قووڵکردنەوەی دەسکردی کەلێنی نێوان رۆڵەکانی نەتەوەیەکی بندەست و بێدەوڵەت بۆ وەدیهێنانی ئایدیا زێهنییەکان و ئایدۆلۆژیا نامۆکان بە پرسی نەتەوە و نەتەوایەتی لە ژێر ناوی “خەبات و ململانێی چینایەتی” لە قۆناغی رزگاریی نیشتمانیدا، تەنیا ریزەکانی ئەو نەتەوەیە پڕش و بڵاو دەکا و دەرفەتی خۆ رێکخستن و یەکێتی نەتەوەیی بۆ رزگاریی و سەربەخۆیی نەتەوەیی لەبار دەبا کە دەشێ نەتەوەی سەردەست و دەوڵەتی داگیرکەر کەڵکی لێوەربگرن.
بەم پێیە ‌ئه‌رکی رزگاریی نەتەوەیی و نیشتمانیی و پێکهێنانی ده‌وڵه‌تی نه‌ته‌وه‌یی و کۆمه‌ڵگه‌یه‌کی ئازاد و دادپەروه‌ر، کرێکاران و زه‌حمه‌تکێشان و باقی چین و توێژه‌کانی کوردستان له‌یه‌ک سه‌نگه‌ری هاوبه‌ش و له‌ژێر یه‌ک ئاڵادا، یه‌کگرتوووانه‌ و دژ به‌یه‌ک دوژمن کۆده‌کاته‌وه ‌که‌ بریتیە لە: سه‌نگه‌ری راماڵینی داگیرکەران و هەڵگرتنی حاکمیەتی تاران لە سەر کوردستان ‌و ئاڵای پیرۆزی کوردستان و ئامانجی سه‌روه‌ریی و سەربەخۆیی و بەدەوڵەتبوونی کوردستان.
لە کاتێکدا کە بزووتنەوەی رزگارییخوازیی نەتەوەیی کوردستان، رێزی لە بەها جیهانییەکان و بۆنە نێونەتەوەییەکان گرتووە، کەچی مخابن، نە بەهاجیهانییەکان ئەوەندە بۆ دەوڵەتان گرینگ بوون کە بە پێی ئەوان، دان بە مافەکانی کوردا بنێن و نەیانکەنە قوربانیی بەرەژەوەندییەکانیان و، نە بۆنە نێونەتەوەییەکان بوونەتە دەرفەتێ بۆ ئەوەی دەوڵەتان و کۆمەڵگاکانیان بە هانای نەتەوەی ماف و گیان پێشێلکراوی کوردەوە بێن. بۆیە کرێکاران و زەحمەتکێشانی کوردستان له رۆژی جیهانیی کرێکاردا ئەو مافە بە خۆیان دەدەن کە بە دوو دڵی و گومانەوە لە راستگۆیی و پابەندیی دەوڵەتان و کۆمەڵگاکانیان بە چەمک و بۆنە جیهانییەکان بڕوانن.
ئەوەندەی کە بۆ یه‌کێتی و سه‌ندیکا کرێکارییه‌ جیهانییەکانیش دەگەرێتەوە، لە روانگەی کرێکاری کوردەوە پێوەری پابەندیی ئەوان بە پەیامی یەکی ئایار ئه‌وه‌یه ‌که ‌له‌ خه‌باتی نەتەوەی کورد بۆ وه‌ده‌سهێنانی مافی دیاریکردنی چارەنووسی سیاسی پشتگیریی بکەن و به‌ربینگی ئه‌و ده‌وڵه‌تانه‌یان بگرن که ‌بایه‌خه‌ ئینسانییه‌کانیان له‌گه‌ڵ قازانجه ‌ئابوورییه‌کان ‌گۆڕیوه‌ته‌‌وه ‌و رێگایان نه‌داوه ‌کوردیش وه‌ک نه‌ته‌وه‌کانی دیکه‌ی جیهان، ببێته‌خاوه‌ن ده‌وڵه‌تی خۆی و هاوکاریی تێرۆریزمیی دەوڵەتیی داگیرکەرانی کوردستانیان کردووه ‌بۆ سه‌رکوتکردنی خه‌بات و راپەڕینه‌کانی کورد و چه‌وساندنه‌وه‌ی نه‌ته‌وه‌یه‌کی کۆڵۆنی کراوی 40 ملوێنی و تێرۆر و هه‌ڵواسینی سه‌رکرده‌کانی‌.
کرێکارانی کوردستان ته‌نیا به‌مجۆره‌ده‌توانن، چەمکی “هاوپشتی” و ” هاوپێوه‌ندیی ” کرێکارانی جیهان و چینی کرێکاری ئه‌و وڵاتانه‌ی هه‌رکام پارچه‌یه‌ک له‌کوردستانیان پێوه‌لکێندراوه، بە هێند بگرن و یه‌که‌می مانگی مای به‌رۆژی ” هاوپشتی” و ” هاوپێوه‌ندیی” کرێکاران دابنێن. دەنا، هەر جۆرە، گوتارێکی لەو چەشنە، دەچێتە خانەی خاپاندن و قوربانی کردنی کورد و بەرژەوەندییە باڵاکانی.
پارتی ئازادیی کوردستان پیرۆزبایی ئەم رۆژە پێشكەشی هەموو کرێکاران و زەحمەتکێشانی کوردستان بە ژن و پیاوەوە دەکا. هیوادارین جەژنەکانی داهاتووی یەکی ئایار لە کوردستانێکی سەربەخۆ و ئازاد و دێموکرات دا بکەینەوە. کوردستانێک کە تێیدا دادپەروەریی کۆمەڵایەتی بەرقەرار بێ و چەوسانەوەی مرۆڤ بە دەستی مرۆڤ کۆتایی پێ بێ. تەنیا ئەو کاتەیە کە کرێکاری کورد وەک مرۆڤێکی ئازاد دەتوانێ بە پلە و پایەی شیاوی ئینسانیی خۆی بگا و لە بندەستی نەتەوەیی و چەوسانەوە چینایەتی رزگار بێ.

پارتی ئازادیی کوردستانPAK
10 گوڵانی2718
30 مایسی 2018

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

دەتوانی ئەو تاگ و خەسڵەتانە HTML بەکاربێنیت: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>