سڵاو له‌ 2ی رێبەندان رۆژی سەربەخۆیی و به‌ده‌وڵه‌تبوونی کورد به‌یاننامه‌ی کۆمیته‌ی ناوه‌ندی PAK به‌ بۆنه‌ی72 هه‌مین ساڵوه‌گه‌ڕی دامه‌زراندنی ده‌وڵه‌تی جهموری کوردستان

رۆڵه‌کانی نه‌ته‌وه‌ی گەورەی کورد!
کوردستانییه‌ وڵاتپارێزەکان!
خه‌باتگێڕانی رێگای ئازادیی و سه‌ربه‌خۆیی کوردستان!
ئه‌مڕۆ 2 رێبه‌ندانی 2717 کوردی، 22ژانوییه‌ی 2018 زایینی، 72 ساڵ به‌سه‌ر دامه‌زراندنی ده‌وڵه‌تی جمهوری کوردستان، له‌ مهابادی پایته‌خت، تێده‌په‌ڕێ.
72 ساڵ له‌مه‌وبه‌ر له‌م رۆژه‌دا، چوارچرای مهاباد شایه‌تی بڕیارێکی مێژوویی نه‌ته‌وه‌ی کورد بوو. ئه‌و رۆژه‌ له‌ میتینگێکی جه‌ماوه‌رییدا به‌ ئاماده‌بوونی پێشه‌وا قازی محه‌ممه‌د و ” زه‌عیمی شۆرشی بارزان” و خه‌باتگێڕانی پارچه‌کانی دیکه‌ی کوردستان ،

ده‌وڵه‌تی جمهوری کوردستان راگه‌یه‌ندراو پێشه‌وا وه‌ک سه‌رکۆمار سوێندی خوارد که‌: ” تا ئاخر هه‌ناسه‌ و ئاخر تنۆکی خوێن، به‌گیان و به‌ماڵ له‌ ڕێی راگرتنی سه‌ربه‌خۆیی و به‌رزکردنه‌وه‌ی ئاڵای کوردستاندا” تێبکۆشێ.
دامه‌زراندنی دەوڵەتی جمهووری کوردستان رەتکردنەوەی ناسنامەی ساختەی “ئێرانیبوون” وسووربوون لە سەر ناسنامەی راستەقینەی “کورد بوون” بوو.
کۆماری کوردستان وه‌دیهاتنی ئاواته‌کانی حه‌زره‌تی خانی و حاجی قادری کۆیی و به‌ری خه‌باتی دوور درێژی کورد و ره‌نج و خوێنی سه‌رکرده‌ مێژووییه‌کانی وەک : میربه‌درخان، شێخ عوبه‌یدوڵڵا نه‌هری، شێخ عه‌بدوسه‌لام بارزانی، شێخ سه‌عیدی پیران، سه‌یدره‌زای ده‌رسیم،سمایل ئاغای سمکۆی و مه‌لیکی کوردستان شێخ مه‌حمود و هه‌ڵۆکه‌ی ئارارات ژێنێڕاڵ ئیحسان نووری پاشا بوو.
به‌دامه‌زراندنی جمهوری کوردستان، نه‌ته‌وه‌ی کورد له‌ به‌شێک له‌ نیشتمانه‌که‌یدا بووه‌ خاوه‌ن سه‌ره‌وه‌ریی سیاسیی و ده‌وڵه‌تێکی مۆدێڕنی نه‌ته‌وه‌یی بنیات نا.
ده‌وڵه‌تی جمهوری کوردستان متمانه‌ و باوه‌ڕبه‌خۆ بوونی بۆ مرۆڤی کورد گه‌ڕانده‌وه‌، نیشانه‌ و ئاسه‌واره‌ سیاسی و کولتورییه‌کانی ده‌وڵه‌تی داگیرکه‌ری بەر راماڵیندا. کوردی کرده‌ خاوه‌ن ئاڵا و سروودی فەرمی و سوپای میللی‌؛ ناکۆکی و دوژمنایه‌تی له‌ نێو خه‌ڵک و خێڵه‌کان نه‌هێشت، زمانی به‌ زۆر سه‌پاوی بێگانه‌ی له‌ خوێندن و خوێندنگاکان هه‌ڵگرت وزمانی کوردیی فه‌رمیی کرد، رمێنی به‌ خوێندن و خوێنده‌واری دا، چاپخانه‌ و رادیۆ و سینه‌ما و شانۆ و کتێبخانه‌ی میللیی دامه‌زراند، کورد له‌ گه‌ڵ ده‌وڵه‌تان که‌وته‌ وتوێژی راسته‌وخۆی سیاسی و مامه‌ڵه‌ی ئابووری، رۆژنامه‌ و کۆواری کوردی له‌دایکبوون و فه‌رهه‌نگ و وێژه‌ی نه‌ته‌وه‌یی قۆناخێکی پرشنگداری به‌خۆوه‌ دیت. ژنان مافی به‌شداریی له‌ ژیانی سیاسیی و پێکهێنانی رێکخراوه‌ی تایبه‌ت به‌خۆیان ده‌سکه‌وت، که‌مایه‌تییه نه‌ته‌وه‌یی و دینی و مه‌زهه‌بییه‌کانی ناوچه‌کانی به‌رفه‌رمانی کۆمار وه‌ک هاونیشتمانیی یه‌کسان له‌گه‌ڵ کورد هه‌ڵسووکه‌وتیان له‌گه‌ڵ کرا و له‌گه‌ڵ کۆماری ئازه‌ربایجانیشدا په‌یمانی هاوکاریی دراوسێتی به‌سترا.
کۆماری کوردستان له‌ هه‌رێمێکی رۆژهه‌ڵاتی کوردستان دامه‌زرا، به‌ڵام قەوارەیەکی کوردستانیی بوو. کۆمار ببووە مەکۆی هەموو شۆڕشگێرانی کورد و ئامانج و ئاواتی گشت کوردی له‌خۆ گرتبوو. کۆمار به‌ ته‌ما بوو، پرشنگی رووناکه‌ییه‌که‌ی بگاته‌ هه‌موو پارچه‌ و به‌شه‌کا‌نی نیشتمانی داگیر کراو. هه‌ر بۆیه‌ ببووه‌ هێمای یه‌کبوونی نه‌ته‌وه‌یی کورد.
هه‌موو ئه‌و ده‌سکه‌وتانه‌ ته‌نیا له‌ ماوه‌ی یازده‌ مانگ ته‌مه‌نی ده‌وڵه‌تی جمهوری کوردستاندا وه‌دییهاتن؛ ماوه‌یه‌ک که‌ بۆ خۆڕێکخستن و خۆ به‌ڕێوه‌بردنی نه‌ته‌وه‌یه‌ک ته‌نیا چرکه‌یه‌ک‌ له‌ مێژوو ده‌ژمێردرێ؛ ئه‌وه‌ش له‌ کردن نه‌ده‌هات ئه‌گه‌ر ژیریی و دڵسۆزیی گه‌وره‌ سه‌رکرده‌یه‌کی وه‌ک پێشه‌وا قازی محه‌مه‌د و پشتیوانی وەک مەلامستەفا بارزانی نه‌بایه‌.
به‌مجۆره‌ له‌ ژینگه‌ و پێکهاته‌یه‌کی کشتووکاڵی و خێڵه‌کییدا، کۆماری کوردستان ره‌شماڵی ده‌وڵه‌تی مۆدێڕنی نه‌ته‌وه‌یی و رێژیمی دیمۆکراسیی هه‌ڵدا و وه‌ک چرایه‌ک له‌ تاریکستانی دیکتاتۆریی شاهه‌نشاهی ئێران و تووتالیتاریسمی ناوچه‌که‌دا ده‌دره‌وشایه‌وه‌ .
مخابن، کۆماری کوردستان بوو به‌ قوربانیی به‌رژه‌وه‌ندیی زلهێزه‌کان و سات و سه‌وداکانی رێژیمی داگیرکه‌ری تاران. ئاستی توانای کوردیش نه‌یتوانی هاوکێشه‌کان به‌ قازانجی خۆی رابگرێ و پیلان و ته‌ون و به‌سته‌ سیاسییه‌کان پووچه‌ڵ بکاته‌وه‌. سه‌ره‌نجام کۆمار ڕووخا؛ سه‌رۆک کۆمار و ژماره‌یه‌ک له‌ باشترین کاربه‌ده‌ست و ئه‌فسه‌رانی کۆمار له‌ مهاباد و بۆکان و سه‌قز له‌ لایان رێژیمی شا و 4 ئه‌فسه‌ره‌که‌ی هه‌یئه‌تی ئازادییش، له‌ عێراق له‌ سێداره‌ دران. خه‌باتگێڕانی پارچه‌کانی دیکه‌ی کوردستانیش ماڵیان لێتێکچوو و په‌ڕه‌وازه‌ بوون.
رووخانی کۆماری کوردستان گورزێکی کاریگه‌ری سیاسی و ڕەوانیی بوو له‌ ناسیۆنالیزمی کورد و ئاکام و خه‌ساری گه‌وره‌ و گرانی به‌ دواداهات. به‌م رووداوه‌، کورد له‌ ده‌سه‌ڵات و سه‌ره‌وه‌ریی سیاسی که‌وت و هه‌موو ده‌سکه‌‌وته‌کانی له‌ کیسچوون. بێجگه‌ له‌وه‌ش پاش چەن ساڵێک بزووتنه‌وه‌ی سیاسی کورد، له‌ ناسنامە و رێگای راسته‌قینه‌ی خۆی ترازا و ئامانجی روونی رزگاری و سەربەخۆیی وگۆڕا بە ” خودموختاری” . ئێرانچێتی و ئایدۆلۆژیای بێگانه‌ ترنجایه‌ نێو‌ بزووتنه‌وه‌ی سیاسی کورد و ئه‌و بنه‌ما فکرییانه‌ی کۆمارییان له‌ سه‌ر بنیات نرا، کرچ و کاڵ بوونه‌وه‌‌ و بزووتنه‌وه‌ی رزگاریخوازیی نه‌ته‌وایه‌تی کورد له‌ رۆژ‌هه‌ڵاتی کوردستان ناسنامەی‌ “ئێرانی” بەبەردا کرا.
به‌ڵام هه‌رچه‌ن کۆماری کوردستان ڕووخا و ئه‌و ئاکامه‌ تفت و تاڵانه‌ی بۆ کورد به‌ دواداهات‌، هه‌رگیز ئه‌و چرایه‌ی له‌ چوارچرا هه‌ڵکرا له‌دڵی رۆڵه‌ به‌ ئه‌مه‌گه‌کانی ئه‌م نه‌ته‌وه‌یه‌دا نه‌ کوژایه‌وه‌؛ تێکۆشه‌رانی نه‌ته‌وه‌که‌مان له‌ دۆخ و قۆناخی جۆراوجۆر و هه‌رجاره‌ی له‌ پارچه‌یه‌کی نیشتماندا ئاڵای خه‌باتیان هه‌ڵکرده‌وه‌. لە 25ی سێپتامبری 2017دا رۆڵەکانی نەتەوەکەمان و کوردستانیان لە باشووری کوردستان لە رێفراندۆمێکی مێژووییدا دەنگیان بە سەربەخۆیی کوردستاندا و جارێکی دیکە ئەو پەیامەیان بە جیهان دا کە نەتەوەی کورد سەرەڕای دژاواییەکانی ئەو رێگایە، دەست لە ئامانجی سەربەخۆیی و دامەزراندنی دەوڵەت هەڵناگرێ.
دووی رێبەندان، جەژنی سەربەخۆیی و بەدەوڵەتبوونی کورد، لە کاتێکدا دەگەڕێتەوە کە کوردستان، خەبات و دەسکەوتەکانی کەوتوونەتە بەر گەلەکۆمە و هێرش و هەڕەشەی داگیرکەرانی کوردستان و لا بۆ شلکردن، خۆ گێل کردن یان هاوکاری هێندێ دەوڵەتی گەورەی بێ بەڵێن دژ بەکورد. بەڵام بە هەموو ئەو خەسارەتانەی لە ئاکامی ئەم حاڵەتەدا تووشی نەتەوەکەمان بووە، مێژوو سەلماندووییە کە خەرج و خوێنی دوژمنانی کورد بۆ بێدەنگ کردن و بەچۆکدا هێنانی ئەم نەتەوە کۆڵنەدەرە هەر بە فیڕۆ دەچێ و شۆرش و بەرخۆدانی کورد لە خوێن و ئازارەکانییدا سەرهەڵدەداتەوە. گەلەکۆمەی داگیرکەران و بێ بەڵێنی دەوڵەتانی بەناو دۆستی کورد و ئەو خەسارەتانەی لێیکەوتووەتەوە، ئەزموون و راستییەکی دیکەش پیشانی هەموو تاکێکی کورد دەدا کە بریتییە لەوەی: تا کاتێک کوردستان نەبێتە خاوەن دەوڵەت و سەروەریی، خاک و خەڵک و سنوور و سامانی هەردەم لە بەر هەڕەشە و مەترسیی و سات و سەودادایە و هەر دەسکەوتێکیش هەر چەندە گەورە و گرینگ بێت، پارێزراو نابێت!
بۆیە لەم بۆنە نەتەوەییەدا ولەم ئان ساتە هەستیار و پڕ ژان کەسەرەدا کە نەتەوەی کوردی پێدا تێدەپەڕێ، پارتی ئازادیی کوردستان وه‌ک میراتگری راستەقینەی پەیام و بنەما فکری و سیاسییەکانی کۆماری کوردستان لە گەڵ پێشەوای شەهید و کۆماری جوانەمەرگی کوردستان و کەرکووک و عەفرینی خەیانەت و غەدرلێکراو پەیمان دەبەستێ کە هەرگیز لە رێگای خەبات لە پێناو سەربەخۆیی و بەدەوڵەتبوون و یەکگرتنەوەی کوردستانی دابەشکراو لانەدا.

ده‌با بیره‌وه‌ریی کۆماری سه‌روه‌ریی و سه‌ربه‌ستی، ئیلهامبه‌خشی خه‌باتمان بێ له‌ پێناو ئازادیی و سه‌ربه‌خۆیی و دامه‌زراندنه‌وه‌ی ده‌وڵه‌تی جمهووری کوردستان.
پارتی ئازادیی کوردستانPAK
کۆمیته‌ی ناوه‌ندی
2 رێبه‌ندانی2717
22 ژانویه‌ی 2018

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *