شەکاوە بێ ئاڵای ئازادیی و سەربەخۆیی کوردستان

به‌یاننامه‌ی پارتی ئازادیی کوردستان

به‌ بۆنه‌ی 26ی سه‌رماوه‌ز، رۆژی ئاڵای کوردستان

 

هەڵکردنی ئاڵای کوردستان و داگرتنی ئاڵای ئێران لە کوردستان 68 ساڵ لەمەوبەر، هەڵقوڵاوی ئیرادەی لێبڕاوی نەتەوە و سەرکردایەتییەک بوو کە سوور بوو لەسەر پاراستنی ناسنامەی جیاواز و سەربەخۆی خۆی و بڕیاری دابوو سەروەریی کورد لەجیاتی سەروەریی دەوڵەت و نەتەوەیەکی دیکە، لەسەر خاک و نیشتمانی خۆی دابنێ. هەربۆیە پاش تێپەڕینی ماوەیەکی کەم لەو هەنگاوە، دەوڵەتی جمهووریی کوردستان راگەیەندرا.

بۆ خەباتگێڕانی ریزەکانی پارتی ئازادیی کوردستان شانازییەکی گەورەیە کە پاش نزیکەی 50 ساڵ لە هەرەسی کۆمار و نەمانی ئاڵا لە بزووتنەوەی کورد دا و تەنانەت گرتنەوەی رۆژەکەی بە بۆنەیەکی دیکە، 20 ساڵ لەمەوبەر بەدەستی رێبەرایەتیی پارتی ئازادیی کوردستان هەڵکرایەوە و کرایە یەکێک لە توخمەکانی ناسنامەی سیاسیی و رێکخراوەیی PAK. هەروەها هەر لەو کاتەدا و لە پڕۆسەی هەڵکردنەوەی ئاڵا لەسەر چیاکان و شار و گوندەکانی نیشتمانی داگیرکراو، 20 فەرماندە و پێشمەرگەی بەوەجی پارتی ئازادیی کوردستان، لە تێکهەڵچوون لەگەڵ هێزە داگیرکەرەکانی بەرفەرمانی تاران دا، گیانیان بەختکرد و شەهید بوون.

ئەمڕۆش کە 26 سەرماوەز (17 دیسامبر) لە باشووری کوردستان بە فەرمیی وەک “رۆژی ئاڵا” رێزی لێدەگیرێ، ئەو شانازییە پتر دەکا. ئێمە ئاواتەخوازین کە ئەو ئاڵایە لە هەموو بەش و پارچەکانی کوردستان هەڵکرێ. هەروەها هیوادارین بە خەباتی شێلگیرانەی رۆڵەکانی نەتەوەکەمان، رۆژێک‌دابێ کە ئاڵای کورد و کوردستان لە رێکخراوی نەتەوەیەکگرتووەکان لە تەنیشت ئاڵای نەتەوە و دەوڵەتانی دیکە بشەکێتەوە.

خەباتگێڕانی ریزەکانی پارتی ئازادیی کوردستان لەم رۆژەدا لە هەر کوێ بن، ئاڵاهەڵدەکەن، لە حاستیدا رادەوەستن و سڵاوی پێشکەش دەکەن و بەڵێن دەدەنەوە کە هەتا رادانی دووا سەربازی داگیرکەر لەسەر نیشتمان و هەڵکردنی ئەو ئاڵایە لە هەموو خاکی کوردستان و دامەزراندنەوەی دەوڵەتی جمهووریی کوردستان، لە خەبات نەسرەون.

 

  هه‌ر شه‌کاوه‌ بێ ئاڵای پیرۆزی کوردستان

پارتی ئازادیی کوردستان

کۆمیتەی ناوەندی

26 سەرماوەزی 2713

17 دیسامبری 2013

Share Button

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *