په‌یامی سه‌رۆكی PAK به‌ بۆنه‌ی 28 هه‌مین ساڵی دامه‌زرانی پارتی ئازادیی كوردستان

بە ناوی خوای گەوره‌!
ئۆگران و رێبوارانی ئازادیی و سەربەخۆیی کوردستان!
فەرماندە و پێشمەرگە و تێکۆشەرانی ریزەکانی پارتی ئازادیی کوردستانPAK!بنەماڵەی سه‌ربه‌رزی شه‌هیدان و پێشمه‌رگه‌!
30 گوڵانی 2719، بیست و هه‌شت ساڵ لە تەمەنی پڕ سەروەریی پارتی ئازادیی کوردستان تێپەڕ ده‌بێ.

بنیات و فەلسەفەی لە دایکبوونی پارتی ئازادیی کوردستان، گەڕاندنەوەی کورد و بزووتنەوە سیاسییەکەی رۆژهه‌ڵاتی كوردستان بوو بۆ سەر ناسنامە و گوتار و رێبازی رەسەن و راستەقینەی خۆیان.
بە لەدایکبوون و وەسەرپێکەوتنی پارتی ئازادیی کوردستان، رۆژهەڵاتی نیشتمان بووە خاوەنی دیسکۆرس و ئەدەبیات و ستراتیژ و سیاسەت و پراکتیکێک کە تەنیا لە سەردەمی ژێکاف و دەوڵەتی جمهوری کوردستاندا، بەخۆیەوە دیتبوو. رێبه‌ری شه‌هیدی PAK له‌ تۆرمه‌ی شێخی نه‌هری و سمایلاغای سمكۆ و پێشه‌وا قازی محه‌ممه‌د بوو. له‌ ده‌ماره‌كانی ئێمه‌دا، خوێنی ئه‌وان ده‌گه‌ڕێ و له‌ هه‌نگاوه‌كانماندا ئه‌وانمان لێدیاره‌.
ناسنامە، گوتار، ستراتیژ، ستراکچێر و پڕۆژە و رەفتاری سیاسیی پارتی ئازادیی کوردستان، هەڵقوڵاوی دۆخ و دەرد و دەرمانی کوردستان و پرسە سیاسییەکەیەتی.
بۆیە نەخوێنی ئەوانە بەفێڕۆ دەڕوا کە گیانیان لە ریزەکانیدا بەختکردوە و نە رەنجی ئەوانە بەخەسار دەچێ کە لە پێناو ئامانجەکانییدا تێدەکۆشن.
لەم یاد و بۆنە مێژووییەدا، سڵاوی ئەمەگ و وەفا پێشکەشی رێبەری شەهیدمان دامەزرێنەری پارتی ئازادیی کوردستان، رچه‌شكێنی رێبازی ده‌وڵه‌ت و سه‌ربه‌خۆیی، كاك سه‌عید یه‌زدانپه‌نای نەمر دەکەم.
سڵاوی میراتگرانە و خوێن ئەستێنانە پێشكه‌ش کاروانی شەهیدانی 28 ساڵ خەباتی کۆڵنەدەرانەی پارتی ئازادیی کوردستان؛ ئەوانەی وا لە سەر خاکی رۆژهەڵاتی نیشتمان و لە گەڕیانی به‌ره‌نگاریی و شه‌ڕ لە گەڵ هێزەداگیرکەرەکانی بەرفەرمانی تاراندا گیانیان بەخت کردوە؛ یان لە زیندانەکانی دوژمنی داگیرکەردا بە سەری بەرزەوە بەرەو پەتی سێدارە ومەیدانی ئێعدام چوون، یان لێرە و لەوێ بە فەرمانی تاران تێرۆر کران.
سەری رێز دادەنه‌وێنم لە حاست هەڤاڵانی شەهیدمان لە جەنگی دژه‌ تێرۆر و بەرەنگاربوونەوەی دەوڵەتی تێرۆریستیی داعش دا.
سەری رێز لە حاند خوێن و عاره‌قه‌ی ئەو هەڤاڵانە دادەنەوێنم کە لە حەماسەی مێژوویی و چارەنووسسازی” پردێ” دا، لە بەرەنگاربوونەوەی سوپاکانی تاران و بەغدا و تێكشكاندنی ئه‌و پیلانه‌ نێوده‌وڵه‌تییه‌دا، رژان.
هەروەها، زام و برینی سەر و لەشی ئەو فەرماندە و پێشمەرگە قارەمانانەی پارتی ئازادیی کوردستان ماچ دەکەم کە لە هەر سەنگەر و گۆڕەپانێکی ئەو 28 ساڵەدا پێکرابن.
دەست و چەکی ئەو فەرماندە و پێشمەرگانە لە بانسەر و لە سەر دڵم دادەنێم کە لە تەمەنی28 ساڵەی PAK دا لە رۆژهەڵاتی نیشتمان یان لە پارچەکانی دیکە، بەرەنگاریی سوپاکانی تاران و داعش و بەغدا بوونەتەوە و نیشتمان ونەتەوەکەیان بە تەنیا جێنەهێشتووە.
سڵاو دەنێرم بۆ تەوارەکانی ئازادیی کوردستانTAK کە به‌ بوونی له‌شكره‌ شكۆبه‌خشه‌كه‌یان، مانایان بە ماف وئەرک و رۆڵی ژنی کورد لە رۆژهەڵاتی کوردستان بەخشیوە.
سڵاو دەنێرم بۆ هەڵۆکانی ئازادیی کوردستانHAK کە لە هەناوی رۆژهەڵاتی داگیرکراودا تێدەکۆشن و بەگژ سوپای داگیرکەردا دەچنەوە.
بەگەرمی دەستی ئەو هەڤاڵانە دەگووشم کە لە هەندەران و دەرەوەی وڵات، بوونەتە باڵوێزی خۆبەخشی کوردایەتی و پەیامدەری سەربەخۆیی و بەدەوڵەتبوونی کوردستان.
هەروەها سڵاو و سوپاسی گەرم پێشکەشی هەر رۆڵەیەکی نەتەوەکەمان لە چوارپارچەی نیشتمان دەکەم کە بە هەر شێوەیەک و بەهەر رادەیەک پاڵپشتی و هاوکاری و هاودڵی لە گەڵ پارتی ئازادیی کوردستان کردوە.
له‌م بۆنه‌یه‌دا و له‌م هه‌لومه‌رجه‌دا كه‌ كوردستان و ناوچه‌كه‌ی پێدا تێده‌په‌ڕن، رۆڵه‌كانی نه‌ته‌وه‌كه‌مان دڵنیا ده‌كه‌ینه‌وه‌ كه‌ پارته‌ نه‌ته‌وه‌ییه‌ سنوورنه‌ناسه‌كه‌یان، هه‌روا پڕ به‌ به‌های ماف و خه‌بات و قوربانییه‌كانی رۆژهه‌ڵاتی داگیركراو، ئاكتۆری چالاكی سیاسیی- سه‌ربازیی رووداو و پێشهاته‌كان و له‌نگه‌ری قایمی كوردایه‌تی و كوردستانته‌وه‌ریی ده‌بێ.

سڵاو لە پارتی ئازادیی کوردستان، قوتابخانەی بیر و کرداری نەتەوەیی، دەوڵەتخوازیی، فیداکاری و ئەخلاقمەداری.

حسین یەزدانپەنا
28 گوڵانی 2719
18 مایسی 2019

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *