پەیامی هاوخەمی سەرۆکی پارتی ئازادیی کوردستانPAK بە بۆنەی بوومەلەرزەکەی شەوی رابردووەوە

بە ناوی خوای گەورە و دلۆڤان
لە کاتێکدا نەتەوەکەمان لە رۆژهەڵاتی ناوەڕاست، تاساو و خەمباری ئەو غەدر و پیلانگێڕییە نێودەوڵەتییە بوو کە لە دژی باشووری کوردستان رووی دابوو؛ بوومەلەرزەکەی شەوی رابردوو خەم و پەژارەی کوردستانیانی چەن قات کرد. کارەساتێک کە بووەتە هۆی گیان لە دەسدانی زیاتر لە 200 کەس و برینداربوونی پتر لە 2000 کەس لە دانیشتوانی شار و گوندەکانی پارێزگای کرماشان و رمان و وێرانبوونی ماڵ وحاڵیان و گیان لە دەسدان و بریندار بوونی ژمارەیەک هاوڵاتیی ناوچەی حەلەبجە.
لە کاتێکدا سەروەت و سامانی زۆر و زەوەندی نەتەوەیی کورد لە رۆژهەڵاتی نیشتمان لە لایان تارانەوە، بە تاڵان دەبرێ و خەرجی دەوڵەت و دەسەڵاتی داگیرکەری ئێران دەکرێ، کەچی خاوەنانی راستەقینەی ئەو سەروەرت و سامانە لەم کارەساتەدا وەک هەمیشە بێ فریادرەس ماوەنەتەوە و لە ئاکامی خەمساری و دەربەست نەبوونی تاران ، ژمارەی قوربانیی و ماڵوێران بووان و ئاوارەکانمان لە هەڵکشانی بەردەوامدایە.

پارتی ئازادیی کوردستان بەمبۆنە دڵتەزێنەوە هاوخەمیی لە گەڵ بنەماڵەی قوربانییان و سەرجەم زیان لێکەوتوانی ئەم رووداوە دەردەبڕێ. هاوکات داوا لە هەموو هاوڵاتییانی خاوەن توانا لە گشت دەڤەرەکانی رۆژهەڵاتی کوردستان دەکا، بە تەمای کاربەدەستانی دەوڵەتی داگیرکەر نەبن و خۆیان بە هانای خوشک و برا لێقەوماوەکانیان لە پارێزگای کرماشانەوە بچن و بە پێشکەش کردنی هاوکاریی، ئەرکی نەتەوەیی خۆیان بەجێ بێنن و باری ئەو کارەساتەیان لە سەر سووک بکەن.
لەم چرکەساتە پڕ خەم و ئازارەی مێژووی نەتەوەکەماندا، بە پێویستی دەزانم پێ لە سەر ئەو راستییە دابگرینەوە کە تەنیا دەوڵەت و سەروەریی سیاسیی دەتوانێ پارێزەری نەتەوەکەمان لە کارەساتە سیاسی و سروشتییەکان بێ و کۆمەڵگای نێودەوڵەتییش تەنیا نەتەوە خاوەن دەوڵەتەکان دەپارێزێ. کە واتە لەم کاتەدا کە هەمیسان گەلەکۆمەکی سیاسی و سەربازی و کارەساتی سروشتی دەرگای بە نەتەوەی کورد گرتووەتەوە، رێبواران و تێکۆشەرانی رێگای سەربەخۆیی و بەدەوڵەتکردنی کوردستان، لە سەریانە لە سەر ئەو رێبازە و وەدیهێنانی ئەو ئامانجە پیرۆزە سوورتر بن و پاشەکشە کاتییەکان و داخ و کەسەری موسیبەتەکان، باوەڕ و ئیرادەیان لەق و شل نەکا.
حسین یەزدانپەنا
22ی خەزەڵوەری 2717
13ی نوامبری 2017

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

دەتوانی ئەو تاگ و خەسڵەتانە HTML بەکاربێنیت: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>