پەیامی گرووپی کاری لاوان و قوتابیانی PAK بە بۆنەی 31مین ساڵیادی ئیعدامی 59لاوی مەهاباد

12 جۆزەردانی ،2685 کوردی بەرانبەر بە(2ژوئەن 1985زاینیی) 59لاوی ‌کورد کە زۆربەیان تەمەنیان خوار 18 ساڵ بوو ، بەفەرمانی حه‌میدڕه‌زا جه‌لایی پوور، فه‌رمانداری ئه‌و کاتی مه‌هاباد، ده‌ستگیر کران و بۆ زیندانی ئورمیە گوازرانەوە، لە دادگایەکی شاراوەدا حوکمی تیربارانکردنایان بەسەردا سه‌پا و لە تەورێز بە کۆمەڵ تیرباران کران.

تاوانی ئەو 59 لاوە کوردە وەک هەموو جارێک هیچ شتێک جگە لە کوردبوون و کوردایەتی نەبوو، كە بوون بە قوربانی سیاسەتە دژی ئینسانییەکانی کاربەدەستانی تاران و گیانی خۆیان بەختی کرد.
سیاسەتی تواندنەوە و قڕ کردن و سڕێنەوە و سەرکوت و زەبروزەنگی کاربەدەستانی تاران نەک هەرگیز کاریی لە ئیرادەی شۆڕشگێڕانە و خەباتکارانەی لاوانی نەتەوەکەمان بۆ گەیشتن بە دەوڵەت و سەربەخۆیی نەکردووە، بەڵکوو خوێنی یەک بەیەکی ئەو شەهیدانە، وزەبەخشی درێژەدانی خەباتەکەیان و تۆڵەی خوێنی بە ناهەق رژاوی برا و هاوڕێ و هاوسەنگەرەکانیان بووە. 
ئێمە وەک گرووپی کاری لاوان و قوتابیانی پارتی ئازادیی کوردستان، جگە لەوەی سوورین لە سەر تۆڵە سەندنەوە و درێژەدانی رێبازیی ئەو شەهیدانە و سەرجەم شەهیدانی بزووتنەوەی رزگاریخوازیی نەتەوەکەمان، ئەم تاوانە دژ بە رۆڵەکانی نەتەوەکەمان و سەرەڕۆیی و جینایەتەکانی دەوڵەتی داگیرکەریی تاران لە رۆژهەڵاتی کوردستان تەنیا بە تاوانی کورد بوون، بە توندیی مەحکووم دەکەین و جارێکی دیکە پێ لە سەر ئەو راستییە دادەگرینەوە کە تەنیا رێگای رزگاریی یەکجاری کوردستانییەکان لە چنگ زۆڵم و زۆر و جینایەتی داگیرکەرانی کوردستان و پاراستنی رۆڵەکانمان لە قەتڵ و عام و کوشت و بڕ، حەولدانە بۆ پێکهێنانی دەوڵەتی نەتەوەیی و راگەیاندنی سەربەخۆیی کورد و کوردستان.
 
 
 
بژی کورد و کوردستان 
گرووپی کاری لاوان و قوتابیانی پارتی ئازادیی کوردستان
کومیتەی ڕاگەیاندن 
11 جۆزەردان 2714 کوردی
1 ژوئەن 2014 زاینیی

 

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *